ئێران دووبارە هەڕەشەی داخستنی گەرووی هورمز دەکات

ئاڤا نیوز

 

ئەندامێکی کۆمیسیۆنی ئاسایشی نیشتمانی و سیاسەتی دەرەوەی ئێران هەڕەشەی داخستنی گەرووی هورمز دەکات و دەڵێت، ئەگەر ڕێگری لە فرۆشتنی نەوتی وڵاتەکەمان بکەن، گەرووی هورمز دادەخەین.

 

هۆکارە زانراوەکان: هەڕەشەکانی ئەو بەرپرسەی ئێران  بۆ سزا ئابوورییەکانی وڵاتانی ڕۆژئاوا دەگەڕێتەوە کە دەیانەوێت ڕێگریی لە هەناردەکردنی نەوتی ئێران بکەن و بۆ کەمترین ئاست دایبەزێنن.

 

بڵاوکراوەی فەرمی: یەعقوب ڕەزازادە، ئەندامی کۆمیسیۆنی ئاسایشی نیشتمانی بۆ میدیاکانی ئێران ڕایگەیاند: ئێران یەکێکە لە گەورەترین هەناردەکارانی نەوت لە جیهان، ئەگەر هەناردەکردنمان بلۆک بکرێ، ئێمە وەڵام دەدەینەوە، ئەوەی بۆ ئێمە نییە، بۆ وڵاتانی دیکەش نابێت، کەنداوی فارس و گەرووی هورمز موڵکی ئێمەن، ئەگەر سنووردارکردن بەسەرماندا بسەپێندرێت، ڕێگە نادەین ئەوانی دیکە تێپەڕن، ئەمەش زیانی بۆ وڵاتانی ئەمریکا و ئەوروپی دەبێت."

 

زانیاریی زیاتر: گەرووی هورمز یەکێکە لە گرنگترین ڕێڕەوە ئاوییەکانی جیهان، نزیکەی 20٪ـی بازرگانی نەوتی جیهانی بەوێدا تێپەڕ دەبێت، کە بە داخستنی نرخی نەوت بەرز دەکاتەوە.