هاتوچۆی هەولێر لەبارەی گۆڕینی تابلۆی ئۆتۆمبێل دەنگۆیەک ڕەتدەکاتەوە

ئاڤا نیوز

ڕاگەیاندنی هاتوچۆی هەولێر ئەو دەنگۆیە ڕەتدەکاتەوە، گوایە بڕیاری گۆڕینی تابلۆی کۆنی ئۆتۆمبێلیان دابێت و وادەشیان دیاری کردبێت.

چیرۆکی سەرەکی: دوو ڕۆژ لەمەوبەر بەدیاریکراوی ڕۆژی هەینی ماڵپەڕێکی عێراقی هەواڵێکی بڵاوکردەوە، گوایە هاتوچۆی هەولێر بڕیاریداوە دوا وادە بداتە ئەوانەی ئۆتۆمبێلەکانیان تابلۆی کۆنە و تا 1-11-2025 ئەوەی نەیگۆڕێت سزا دەدرێت. دواتر هەواڵەکە لە پەیجە عەرەبییە عێراقییەکان بڵاوکرایەوە و نیگەرانی زۆری لای ئەو کەسانە دروست کرد کە لە شارەکانی ناوەڕاست و خوارووی عێراق نیشتەجێن و ئۆتۆمبێلی تابلۆی هەولێریان هەیە.

لێدوانی فەرمی: عەقید هێمن ئەمین، بەڕێوەبەری ڕاگەیاندنی هاتوچۆی هەولێر بە ئاڤای ڕاگەیاند، ئەم هەواڵە سەرلەبەری ڕەتدەکەینەوە. تەنیا لە دوو حاڵەتدا تابلۆی کۆن دەگۆڕێت بۆ نوێ. ئەو کاتەی ئۆتۆمبێلەکە ساڵیانەی بەسەرچووبێ و کاتێ دێت بۆ نوێکردنەوەی ساڵیانەکەی تابلۆکەشی بۆ دەگۆڕێت. یان ئەو کاتەی بە ئارەزووی خۆی نووسراوێک پێشکەش دەکات و داوای گۆڕینی تابلۆکە دەکات.

عەقید هێمن ئەمین دەشڵێت: نزیکەی 300 هەزار ئۆتۆمبێل بە ژمارەی هەولێر لە شارەکانی ناوەڕاست و خوارووی عێراق هەن. خاوەنی ئەم ئۆتۆمبێلانە نیگەران بوون، بەڵام دڵنیایان دەکەینەوە کە ئەم بابەتە ناڕاستە.