مەسرور بارزانی بۆ ڕەوەندی کورد لە ئەوروپا: پارێزگاری لە کولتوور، زمان و ناسنامەی نەتەوەیی خۆتان بکەن

ئاڤا نیوز

سەرۆکوەزیران مەسرور بارزانی لەگەڵ شاندێکی ڕەوەندی کوردستانی کۆبووەوە و داوای لێکردن پارێزگاری لە کولتوور، زمان و ناسنامەی نەتەوەیی خۆیان بکەن.

چیرۆکی سەرەکی: ئەمڕۆ یەکشەممە 2025-10-05، سەرۆکوەزیران مەسرور بارزانی، پێشوازی لە شاندێکی ڕەوەندی کوردستانی نیشتەجێی ئەوروپا کرد کە لە سەد گەنجی کورد و ژمارەیەک گەنجی بیانی پيکهاتبوو.

ڕاگەیێنراوی فەرمی: ماڵپەڕی حکومەتی هەرێمی کوردستان ڕایگەیاند، سەرۆکوەزیران مەسرور بارزانی لە وتەیەکدا ئاماژەی بە گرنگیی ڕۆڵی ڕەوەندی کوردستانی لە دەرەوەی وڵات کرد لە ناساندنی زیاتری پرسی کورد و پشتیوانیکردنی مافە ڕەواکانی خەڵکی کوردستان. داواشی لە گەنجانی کورد کرد کە پارێزگاری لە کولتوور، زمان و ناسنامەی نەتەوەیی خۆیان بکەن و ببنە پردی پەیوەندیی لەگەڵ کوردستان، داواشی لێکردن نموونەیەکی باش و جوان و سەرکەتوو بن لە نێو ئەو کۆمەڵگانەی تێیدا دەژین، بۆ خۆپێگەیاندن و پێشخستنی تواناکانیشیان سوود لەو دەرفەتانە وەربگرن کە لە دەرەوە هەن.

زانیاریی زیاتر: سەرۆکوەزیران مەسرور بارزانی، تیشکی خستە سەر چاکسازییەکانی حکومەتی هەرێمی کوردستان لە هەموو کەرتەکاندا، لەپێناو بونیادنانی ژێرخانێکی بەهێزی ئابووری لە کوردستان.