سەرۆک بارزانی پاڵپشتیی بۆ چارەسەری ئاشتیانەی دۆزی ڕەوای کورد لە پارچەکانی دیکەی کوردستان دەردەبڕێت

ئاڤا نیوز

سەرۆک مەسعود بارزانی پێشوازی لە ژمارەیەک گەنجی ڕەوەندی کوردستانی کرد، جەختی لە پاڵپشتیی هەرێمی کوردستان بۆ چارەسەری ئاشتیانەی دۆزی ڕەوای کورد لە پارچەکانی دیکەی کوردستان کردەوە.

چیرۆکی سەرەکی: ڕۆژی یەکشەممە 2025-10-05، سەرۆک مەسعود بارزانی لە پیرمام پێشوازی لە 110 گەنجی ڕەوەندی کوردستانی کرد کە لە ناویاندا 12 گەنجی وڵاتانی ئەوروپاییش هەبوون.

ڕاگەیێنراوی فەرمی: بارەگای بارزانی ڕایگەیاند: لەسەرەتای دیدارەکە ئیسماعیل کامیل، سەرۆکی کۆنفیدراسیۆنی ڕەوەندی کوردستانی سوپاسی سەرۆک بارزانی کرد بۆ پاڵپشتی کردن لە هەوڵی کۆکردنەوەی کوردستانیانی دەرەوە لەژێر چەترێکی نیشتیمانی بۆ پاراستنی شوناسی نەتەوەییان، دواتر یاد ئەمین، سەرۆکی فیدراسیۆنی لاوانی ڕەوەندی کوردستانی وێرای دەربڕینی سوپاس و پێزانین بۆ پاڵپشتییەکانی سەرۆک بارزانی، کورتەیەکی لەسەر دامەزراندنی فیدراسیۆنی لاوانی ڕەوەندی کوردستانی و سازدانی ئەم گەشتەی بۆ سەرۆک بارزانی باس کرد، هەروەها تیشکی خستە سەر ئامانجە نزیک و دوورەکانی ئەم پڕۆگرامە.

پەیامی فەرمی: لە دیدارەکەدا سەرۆک بارزانی باسی لە گرنگیی کۆبوونەوەی کوردستانیانی دەرەوە لەژێر چەترێکی نەتەوەیی لە پێناو پاراستنی کولتوور، زمان و شوناسی نەتەوەیی و پاڵپشتیکردنی دۆزی ڕەوای کوردستان کرد، جەختی کردەوە لەسەر ئەوەی گەنجانی کوردستانی لە دەرەوەی وڵاتدا دەبێت پێگەو سەنگیان هەبێت لە ئۆرگان و دامەزراوە ئەوروپیەکاندا، بایەخ بە خوێندن و خۆپێگەیاندن بدەن، ببنە پردێکی بەهێزی پەیوەندی لە نێوان دەرەوە و نیشتیمان، لە دەرەوەش لۆبیەکی بەهێز لە بوارەکانی دیبلۆماسی و سیاسیی و فەرهەنگی بۆ کوردستان دروست بکەن.

لە بەشێکی تری دیدارەکەدا سەرۆک مەسعود بارزانی باسی لە بارودۆخی پارچەکانی تری کوردستان کرد، جەختی لە پاڵپشتیی هەرێمی کوردستان بۆ چارەسەری ئاشتیانەی دۆزی ڕەوای کوردستان لە پارچەکانی تری کوردستان کردەوە.