شارێکی گەورەی پیشەسازی بۆ دروستکردنی ئامێرە کارەباییەکانی ناوماڵ لە هەولێر دادەمەزرێت

ئاڤا نیوز

سەرۆكی دەستەی گشتیی وەبەرهێنانی كوردستان ئاشكرای دەكات، دروستكردنی شاری پیشەسازیی ئامێرە كارەباییەكانی ناوماڵ، لە ئاییندەیەكی نزیكدا دەكەوێتە بواری جێبەجێكردن و ئامێرە دروستكراوەكانی ئەو كارگەیە بەهەمان براند و كوالێتی كۆمپانیا بەناوبانگەكانی جیهان دەبێت.

چیرۆكی سەرەكی: لەسەر بڕیاری سەرۆكوەزیرانی هەرێمی كوردستان، بەمەبەستی پشتیوانیكردن لە كەرتی تایبەت و ڕەخساندنی هەلی كار و دروستكردنی بەرهەمی نێوخۆیی، دەستەی وەبەرهێنان مۆڵەتی دروستكردنی شارێكی پیشەسازیی ئامێرە كارەباییەكانی نێو ماڵی پەسەند كرد كە لەسەر ڕووبەری 2000 دۆنم زەوی و بە سەرمایەی 288 ملیۆن و 469 هەزار دۆلار جێبەجێ دەكرێت و لە ماوەی دوو ساڵدا تەواو دەبێت.

لێدوانی فەرمی: د. محەممەد شوكری، سەرۆكی دەستەی گشتیی وەبەرهێنانی كوردستان تایبەت بە ئاڤا ڕایگەیاند، شارە پیشەسازییەكە لە ئاییندەیەكی زۆر نزیكدا دەچێتە بواری جێبەجێكردن و بەرهەمەكانیشی، بەهەمان براند و كوالێتی وڵاتانی كۆریای باشوور و توركیا دەخاتە بازاڕەوە.

بابەتە ستراتیژییەكە: شاری پیشەسازیی ئامێرە كارەباییەكان ناوماڵ بە هاوبەشیی كەرتی تایبەتی ناوخۆیی و هەردوو وڵاتی كۆریای باشوور و توركیا جێبەجێ دەكرێت، لە نزیكەی 50 كارگە پێك دێت و توانای بەرهەمهێنانی زیاتر لە 30 بەرهەمی كارەباییان هەیە لە چەند كاتژمێرێكدا، بەمەش دەتوانرێت ساڵانە:

165 هەزار موبەڕیدە و سپلیت

172 هەزار غەسالەی قاپن و غەسالەی جل

28 هەزار موجەمیدە و سەلاجە

60 هەزار تەلەڤزیۆن

300 هەزار گسكی كارەبایی

135 هەزار فڕن و مایكڕۆوەیڤ و هەواگۆڕكێی تەباخ

75 هەزار بەڕادی ئاو و دەیان شتی دیكەی وەك وشككەرەوە و عەسارە و ئوتوو و فڕنی نان و هەواكێش و تەباخی چێشتلێنان و خەڵات و بەڕاد و كەلوپەلی دیكەی كارەبایی بەرهەم بهێنرێن.

بۆچی گرنگە: بە دابینكردنی كەلوپەلە كارەباییەكان لە ناوخۆی هەرێمی كوردستان، چیتر پێویست بەوە ناكات بازرگانان ئەو كەلوپەلانە لە دەرەوە هاوردەی كوردستان بكەن، بەڵكو دەتوانرێت لە  كوردستانیشەوە هەناردەی شارەكانی ناوەڕاست و خوارووی عێراق بكرێن، چونكە لەڕووی كوالێتەوە؛ كەلوپەلەكان ئۆرجیناڵ و هاوشێوەی براندە جیهانییەكانن، سەرجەمیشی بە دەستی ناوخۆیی دروست دەكرێن و مۆر و ئاڵای هەرێمی كوردستانیان لەسەر دەبێت، لە لایەكی تریشەوە كارەبا كەم خەرج دەكەن. لەگەڵ ئەوەشدا ئەم كارگانە، زیاتر لە 10 هەزار هەلی كار بۆ گەنجانی كوردستان دەڕەخسێنن.