ئاڤای خەڵک؛ دانیشتووانی گوندێکی سۆران نیگەرانن لە نەبوونی خزمەتگوزاری

ئاڤا نیوز

گوندی سیتکان، یەکێک لە گوندەکانی ناحیەی دیانا لە ئیدارەی سەربەخۆی سۆران، کە نزیکەی 300 ماڵ تێیدا دەژین، ماوەیەکی زۆرە چاوەڕێی جێبەجێکردنی پڕۆژە خزمەتگوزارییە سەرەکییەکان دەکات. 

چیرۆکی سەرەکی: دانیشتووانی گوندی سیتکان لە سۆران، ناڕەزایەتی دەردەبڕن لە دواکەوتنی چاککردنی ڕێگاوبانەکان، ڕاکێشانی ئاوی پاکی خواردنەوە، و دروستکردنی یاریگایەک بۆ گەنجەکانیان. 

لێدوانی فەرمی: فەرزەنگ ئەحمەد، بەڕێوەبەری ناحیەی دیانا بە ئاڤای ڕایگەیاند، لە ساڵی 2024 ـەوە ڕەزامەندی بۆ پڕۆژەی ڕێگای گوندەکە دەرچووە و تێچووەکەی 500 ملیۆن دینارە. سەبارەت بە پڕۆژەی بیری ئاویش، ڕەزامەندی بۆ ئەم پڕۆژەیەش دراوە، بەڵام گرفتی دووری نێوان بیرەکە و ناو گوندەکە هەیە.

زانیاریی زیاتر: فەرزەنگ جەختی لەوە کردەوە کە جێبەجێکردنی هەردوو پڕۆژەکە پەیوەستە بە تەرخانکردنی بودجە وتی: "بۆ هەردوو پڕۆژەکە چاوەڕێی میزانیە دەکەین، هەر کاتێک پارە تەرخانکرا، بە زووترین کات جێبەجێیان دەکەین."