تاران: لە ئەمریکا ناپاڕێینەوە و هیچ پلانێکی کۆبوونەوەمان لەگەڵیان نییە

ئاڤا نیوز

وتەبێژی وەزارەتی دەرەوەی ئێران ئەگەری دانوستان و کۆبوونەوە لەگەڵ ئەمریکا ڕەتدەکاتەوە و ڕایدەگەیەنێت، لەم قۆناغەدا سەرنجمان لەسەر دەرئەنجامی سزاکانە.

وێنە گەورەکە: سەرەڕای هەوڵە دیپلۆماسیەکان بۆ گەڕاندنەوەی ئێران بۆ سەر مێزی گفتوگۆ و دانوستاندن، بەڵام تاران بە هیچ شێوەیەک بە مەرجەکانی ڕۆژئاوا بۆ دەستبەرداربوون لە پیتاندنی یۆرانیۆم ڕازی نەبوو و هیچ کۆبوونەوەیەک ئەنجام نەدرا. دووبارە چالاککردنەوەی سزاکانیش بۆ سەر ئێران هیچ گۆڕانکارییەکی لە هەڵوێستی تاران دروست نەکردووە و ئامادە نییە دانوستان ئەنجام بدات.

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران لە کۆنگرەیەکی رۆژنامەوانیدا ڕایگەیاند: هیچ پلانێک بۆ دەستپێکردنەوەی دانوستان لەگەڵ ئەمریکا بوونی نییە. مەرجی وڵاتانی ئەوروپا زۆر ناڕەوا بوو لە پێناو کۆبوونەوە لەگەڵ ئەمریکا و هەڵوێستەکانیان ئەوەی سەلماند کە ڕێگەچارەی دیپلۆماسی بە بەرژەوەندی خۆیان نازانن، هەربۆیە لە ئاستی نێودەوڵەتیدا واشنتن و هەندێک لە دەوڵەتانی ئەوروپا بە تەواوی متمانەیان لەدەستداوە، هەرچەندە ئێران ڕێگەچارەی دیپلۆماسی بەتەنیا ڕێگەی چارەسەرکردنی هەموو کێشە و ناکۆکییەکان دادەنێت، بەڵام لەم قۆناغەدا تاران و واشنتن کۆنابنەوە.

زانیاریی زیاتر: بەقائی لە وەڵامی پرسیاری ڕۆژنامەنوساندا ڕایگەیاند، تاران هەموو سەرنجی لە سەر دەرئەنجامی سزاکانە و ڕێگەچارەی گونجاو دەدۆزینەوە بۆ مامەڵەکردن لەگەڵ لێکەوتەکانی سزا سەپێنراوەکان. لەگەڵ ئەوەشدا هیچ دەوڵەتێک چاوەڕوانی ئەوە نەبێت تاران لە پێناو دانوستان بپاڕێتەوە و ئەم قۆناغە بە قۆناغی دانوستان نابینین.