پەرلەمانی عێراق سکاڵا لە دژی وەزیری تەندروستی تۆمار دەکات

ئاڤا نیوز

بەهۆی دامەزراندنی فەرمانبەر لەدەرەوەی ڕێنماییەکانی حکومەت، پەرلەمانی عێراق سکاڵای فەرمی لە دژی ساڵح حەسناوی، وەزیری تەندروستی عێراق تۆمار دەکات.

چیرۆکی سەرەکی: لە نووسراوێکدا کە حەیدەر موتەیری، پەرلەمانتاری عێراق، ئاراستەی سەرۆکی دەستەی داواکاری گشتیی کردووە ، تێیدا وەزیری تەندروستی و بەڕێوەبەری گشتیی پلاندانان و پەرەپێدانی سەرچاوە مرۆییەکانی تۆمەتبارکردووە بەوەی لەدەرەوەی ڕێنماییەکانی حکومەت کەسی نزیک لەخۆیان لەسەر میلاکی گشتیی وەزارەتی تەندروستیی دامەزراندووە. 

لێدوانی فەرمی: حەیدەر موتەیری، پەرلەمانتاری عێراق،  ڕایگەیاند: بەپێی نووسراوی وەزارەتی تەندروستی عێراق ژمارە 19744 لە 2025/9/9،  بە واژۆیی وەزیری تەندروستی چەندین فەرمانبەر بەبێ ڕەچاوکردنی پێوەرەکانی کێبڕکێی لەسەر میلاکی وەزارەتی تەندروستی دامەزراون.

زانیاریی زیاتر: موتەیری، لەنووسراوەکەیدا، داوای لێپێچینەوە لەهەریەکە لەوەزیری تەندروستی و بەڕێوەبەری گشتیی پلاندانان و پەرەپێدانی سەرچاوە مرۆییەکانی دەکات، بەهۆی  پێشێلکردنیان لە ماددەی 14ـەی دەستوور کە دەرفەتی یەکسان بۆ دامەزراندن لەکەرتی گشتیی لە نێوان هاووڵاتییاندا لەچوارچێوەی ئەنجوومەنی ڕاژە دەستەبەر دەکات.