پەیامێک لە هەوراز گوڵپییەوە بۆ وەزیرانی کورد لە بەغدا

ئاڤا نیوز

هەوراز گوڵپی پێشکەشکاری ئاڤا میدیا پەیامێک لەبارەی مووچەی فەرمانبەرانی کورستان ئاراستەی وەزیرانی کورد لە بەغدا دەکات و داوایان لێدەکات ڕێگە نەدەن عێراق مووچەی ئەم چەند مانگە بخوات. 

وێنە گەورەکە: هەرێمی کوردستان سەرجەم پابەندییەکانی خۆی بەرامبەر بە بەغدا جێبەجێکردووە لە ناردنی داهاتی نانەوتی بۆ بەغدا و هەناردەکردنەوەی نەوت بۆ بەندەری جەیهان، بەڵام تاوەکو ئێستا حکومەتی عێراق پابەندی خۆی جێبەجێ نەکردووە.  

لێدوانی فەرمی: هەوراز گوڵپی لە گەشتی هەواڵەکانی کاتژمێر حەوت ڕایگەیاند:  قسەی دڵی هەموو خەڵکی کوردستان ئەوەیە، دەبێت سبەینێ هەرچوار وەزیرە کوردەکە لە کۆبوونەوەی ئەنجوومەنی وەزیرانی عێراق، کارێک بکەن، ڕێگە نەدەن حکومەتی عێراق مووچەی ئەم چەند مانگە بخوات.

- لێی بێدەنگ نەبن، بەباشترین شێوە بەرگری لە حکومەتی هەرێمی کوردستان و مووچەخۆرانی کوردستان بکەن.

لە بەشێکی دیکەی قسەکانیدا ڕایگەیاند: پێشتر داوایان ئەکرد، کە حکومەتی کوردستان، نەوت بنێرێت، کێشەی مووچە نامێنێت، داهاتی ناوخۆ بنێرێت، کێشەی مووچە نامێنێت، ئەوەتا حکومەتی کوردستان هەموو بەهانەکانی بەغدای بڕیوە، نەوت و داهاتی ناوخۆی ناردووە، چەندین بەهانەی تریان هەبووە، ئەوانیشی بڕیون،  کەچی بەغدا هەر مووچە نانێرێت و دەستی دەستی بە موچەخۆرانی کوردستان دەکەن.

- ئەم حکومەتەی عێراقیش زۆری نەماوە ئەوەتا بەرەو هەڵبژاردن دەڕۆین، بەهەموویەوە چەند مانگێکی ماوە، دەبێت هەموو هەوڵێک بدەن هیچ مووچەیەکی ئەمساڵی فەرمانبەرانی کوردستان نەفەوتێت، ئەوە مافێکی دەستووری خەڵکی کوردستانە و هیچ منەتێکی تیا نییە.

- ئینجا بۆ دوای ئەم هەڵبژاردنەیش دەبێ پارتی ویەکێتی باش بزانن کە لەگەڵ کێ حکومەت پێکدەهێنن، کارێک بکەن، لە چوار ساڵی داهاتوودا، مووچە نەبێتە هەواڵ.