ئەنجامی کۆتایی هەڵبژاردنی پەرلەمانی سووریا ڕادەگەیێنرێت

ئاڤا نیوز

دوای ڕۆژێک لە بەڕێوەچوونی هەڵبژاردن، ئەمڕۆ دەستەی هەڵبژاردنەکانی سووریا ناوی کاندیدە براوەکانی بۆ پەرلەمانی نوێی سووریا بڵاوکردەوە.

وێنە گەورەکە: دوێنێ بە بەشداری نزیکەی حەوت هەزار ئەندامی دەستەی دەنگدەران و هەزار و 578 کاندید، یەکەمین هەڵبژاردنی پەرلەمان لە دوای ڕووخانی دەسەڵاتەکەی ئەسەد لە سووریا بەڕێوەچوو، بەهۆکاری نەگونجاوی دۆخەکەش لەڕووی ئەمنیی و لۆجستییەوە هەڵبژاردنەکە لە پارێزگاکانی ڕەققە، حەسەکە و سوەیدا بۆ کاتێکی دیکە دواخراون، ئەم سێ پارێزگایەش پێکەوە خاوەنی 19 کورسین لەو 140 کورسییەی بە هەڵبژاردن دیاریی دەکرێن.

لێدوانی فەرمی: نەوار نەجمە، وتەبێژی دەستەی هەڵبژاردنەکانی سووریا ڕایگەیاند، هەڵبژاردنەکەی دوێنێ بە ئاستێکی بەرزی شەفاف و پاک و بێگەرد بەڕێوەچوو، ئەنجامەکانی هەڵبژاردنیش کە ئەمڕۆ ڕاگەیێنران قابیلی تانە لێدان نین و بە پەسەندکراو هەژمار دەکرێن.

گوتیشی، بەڕێوەچوونی هەڵبژاردن لە حەسەکە و ڕەققە پەیوەستە بە جێبەجێکردنی ڕێککەوتنی 10ی ئازار و هیچ وادەیەک بۆ ئەنجامدانی هەڵبژاردن لەو دوو پارێزگایە دیاریینەکراوە، بۆ ئەنجامدانی هەڵبژاردنیش لە ڕەققە، حەسەکە و سوەیدا دەبێت دۆخێکی سیاسی و ئەمنیی گونجاو بڕەخسێنرێت.

ئەمەش بزانە: پەرلەمانی نوێی سووریا لە 210 ئەندام پێکدێت، لەو ژمارەیەش 140 کورسیی بە دەنگدانی دەستەی دەنگدەران دیاریی دەکرێن و 70 پەرلەمانتارەکەی دیکەش لەلایەن سەرۆککۆماری سووریاوە دیاریی دەکرێن.