قاوەخانەیەکی دهۆک بەهۆی فرۆشتنی قاوەیەکی گرانەوە دادەخرێت

ئاڤا نیوز

بەهۆی فرۆشتنی یەک کیلۆ قاوەی گرانبەهاوە و ڕیکلام بۆ کردنی لە تۆڕە کۆمەڵایەتییەکان، قاوەخانەیەک لە دهۆک دادەخرێت. 

چیرۆکی سەرەکی: لە چەند ڕۆژی ڕابردوو قاوەخانەیەکی دهۆک کیلۆیەک قاوەی تایبەتی بە کەسێکی دەوڵەمەند فرۆشتووە بە سێ هەزار و 600 دۆلاری ئەمریکی، لە تۆڕە کۆمەڵایەتییەکانیش ڕیکلامی بۆ ئەو قاوە گرانە کردووە.

زانیاریی زیاتر: قاوەکەی جۆرێکی تایبەتە و لە پەناما بەرهەمهێنراوە، لیژنەکانی چاودێری بازاڕیش بەهۆی ڕیکلامکردن بۆ ئەو قاوە گرانە دووکانەکەیان داخستووە.

لێدوانی فەرمی: شوکری شەفیق، بەرپرسی راگەیاندنی بەرێوبەرایەتیی چاودێری بازرگانی دهۆک بە ئاڤای راگەیاندووە؛ خاوەنی قاوەخانەکە گەنجێکە، لێکۆڵینەوەمان لەگەڵ کردووە ویستوویەتی لە ڕیکلامەکەیدا فێڵ بکات، بۆیە لەلایەن لیژنەکانەوە دەستمان بەسەر قاوەکەدا گرتووە و دووکانەکەشمان داخستووە.

لەلایەکی دیکەوە: ئەحمەد دهۆکی، خاوەنی قاوەخانەکەیە و لەبارەیەوە بە ئاڤای ڕاگەیاندووە: قاوەکە تایبەتە و لەسەر داواکارییەکی تایبەتیش هێناومە، کەسێکی دەوڵەمەند داوای لێکردووم و بۆم هێناوە، لەڕێگای ئۆنلاین لە وڵاتی پەنەما کڕیومە، خۆم سێ هەزار و 400 دۆلارم پێداوە و بە سێ هەزار و 600 دۆلار فرۆشتوومە، بە کەسی دیکەشم نەفرۆشتووە.

ئەوەی پێویستە بیزانیت: قاوەکە ناوی گیشایە، لە بەری درەختی گیشا دروست دەکرێت و بنەچەکەی لە دارستانی گۆڕی گیشا لە ئەسیوپیایە، ئێستا لە چەند وڵاتێکی دیکەی ئەفریقی و ئاسیا و ئەمریکاش بەرهەمدەهێنرێت، بە تامە جیاوازەکەی و گرانی نرخەکەی دەناسرێتەوە.

- بە هۆی ئەوەی جۆرێکی دەگمەنە و لە ژینگەیەکی تایبەتیشدا پێدەگات و لە هەموو شوێنێکدا ناڕوێت، بۆیە لە جیهاندا بڕەکەی کەمە و خواستیشی زۆر لەسەرە بۆیە نرخیشی گرانە.

- نرخی ئەم جۆرە قاوەیە بەپێی شوێن و کوالێتییەکەی و شێوازی گەورەکردنی دارەکەی دەگۆرێت، نرخی جۆرە باشەکانی هەر کیلۆیەکی لە هەزار دۆلارەوە دەستپێدەکات.

- ئەم قاوەیە لە وڵاتی پەنەما هەمیشە نرخی پێوانەیی دەشکێنێت، ساڵانە چالاکییەکی تایبەتیان هەیە و لە مەزاد نرخی قاوەکان دیاری دەکرێت، ئەمساڵ لەو چالاکییەدا کیلۆیەک لە جۆرە تایبەت و دەگمەنەکەی ئەو قاوەیە بە زیاتر لە 30 هەزار دۆلار فرۆشراوە.