پارێزەرێکی سەڵا‌حەددین دەمیرتاش بۆ ئاڤا: دۆخەکە وا دەخوازێت دەمیرتاش ئازاد بکرێت

ئاڤا نیوز

 

پارێزەرێکی سەڵا‌‌حەددین دەمیرتاش ئاماژە بەوە دەدات ئەگەر تاکوو سبەی تورکیا تانە لە بڕیارەکەی دادگای مافی مرۆڤی ئەوروپا نەدات، دادگای تێهەڵچوونەوە چ کاتێک بیەوێت دەتوانێت دەمیرتاش ئازاد بکات.

 

چیرۆکی سەرەکی: هێشتا تورکیا تانەی لە بڕیارەی دادگای مافی مرۆڤی ئەوروپا نەداوە و دۆسیەی دەمیرتاش ڕەوانەی دادگای تێهەڵچوونەوە کراوە، دوو ڕۆژ لەمەوبەر تیمی پارێزەرانی سەڵا‌حەددین دەمیرتاش بە پشتبەستن بە بڕیارەکە بە نووسراوی فەرمی داوای لە دادگای تێهەڵچوونەوەی تورکیا کرد دەمیرتاش ئازاد بکات. ئەگەر تاوەکوو سبەی ‌حکومەتی تورکیا تانە لە بڕیارەکەی دادگای مافی مرۆڤی ئەوروپا نەدات، دەبێت دەمیرتاش ئازاد بکرێت.

 

لێدوانی فەرمی: هادی جین، یەکێک لە ئەندامانی تیمی پارێزەرانی سەڵاحەددین دەمیرتاش بۆ ئاڤا میدیا وتی، هەرچەند زانیارییەکی تەواومان بەدەست نەگەیشتووە، بەڵام لەوانەیە بۆ نیشاندانی نیازپاکی بۆ سەرخستنی پرۆسەی ئاشتی، حکومەتی تورکیا تاوەکو ئێستا تانەی لە بڕیارەکەی دادگای مافی مرۆڤی ئەوروپا نەداوە و دۆسیەی دەمیرتاش بە پەلەپڕوزە ڕەوانە کراوە بۆ دادگای تێهەڵچوونەوە، ئەگەری ئەوە هەیە دەمیرتاش ئازاد بکرێت.

 

زانیاریی زیاتر: ئەو پارێزەرەی دەمیرتاش ئاماژە بەوە دەدات بەپێی سەرجەم یاسا کارپێکراوەکانی تورکیا تاکو بڕیارنەدانی تەواو لەسەر دۆسیەیەک و ساغنەبوونەوەی تاوان، تۆمەتبار نابێت لە 10 ساڵ زیاتر لە زینداندا بهێڵدرێتەوە، دەڵێت: 9 ساڵە دەمیرتاش زیندانی کراوە و زۆری نەماوە ماوەی زیندانیکردنەکەی تەواو بکات.

 

بە تەنیشت ئەم بابەتەوە: هادی جین سەرنج دەخاتە سەر ئەوەی کە دەبێت تەواوی ئەو زیندانییە سیاسییانەش ئازاد بکرێن بە هۆی هاندانی خەڵک بۆ ڕژانە سەرشەقام لەکاتی گەمارۆدانی کۆبانێ لە لایەن داعش، زیندانی کراون و دەڵێت: دادگای مافی مرۆڤی ئەوروپا لەمبارەیەوە پێشتر بڕیاری ئازادکردنی ئەو زیندانییانەی داوە.