وەزیری خوێندنی باڵا: لە نزیکترین دەرفەت زانکۆلاین ڕادەگەیەنین

ئاڤا نیوز

لە پێنجشەممەی ڕابردووەوە پڕکردنەوەی فۆرمی زانکۆلاین تەواوبووە، وەزیری خوێندنی باڵاش دووپاتی دەکاتەوە لە نزیکترین دەرفەت ئەنجامەکەی ڕادەگەیەنن.

چیرۆکی سەرەکی: بۆ پێشکەشکردنی داواکاری وەرگرتن لە زانکۆ و پەیمانگاکان، ڕۆژی سێشەممە 23-9-2025 زانکۆلاین کارا کرا کە تاوەکو کاتژمێر 12ـی شەوی پێنجشەممە 2-10-2025 بەردەوام بوو، لەو ماوەیەدا دەرچووانی پۆلی 12ـی ئامادەیی بە هەموو بەشەکانییەوە (زانستى، وێژەیی، پیشەیی، خوێندنگە نێودەوڵەتییەکان) مافی پێشکەشکردنی داواکارىیان هەبوو.

لێدوانی فەرمی: د. ئارام محەممەد قادر، وەزیری خوێندنی باڵا و توێژینەوەی زانستی بە ئاڤا میدیای گوت: ئامادەکاری دەکەین و لە نزیکترین دەرفەت ئەنجامی زانکۆلاین رادەگەیەنین، پرۆسەکە وەکو ساڵانی ڕابردوو بە شێوەیەکی شەفاف و دادپەروەر جێبەجێ دەکرێت.

بە تەنیشت ئەم بابەتەوە: وەزیری خوێندنی باڵا دووپاتی کردەوە: ئامادەکاریمان دەستپێکردووە بۆ کردنەوەی ڕاوندێکی دیکەی ماستەر و دکتۆرا، پلانی هەندێک زانکۆمان پێگەیشتووە، هەندێک لە پلانانەمان بۆ زانکۆکان گەڕاندووەتەوە بۆ ئەوەی پێداچوونەوەی پێدا بکەین، ئیرادەکە بۆ ئەوەیە ئەمساڵ ڕاوندێکی دیکە بکەینەوە.

ئەوەی پێویستە بیزانیت:  لە پلانی وەرگرتنی ئەمساڵی دەرچووانی 12ـی ئامادەیی لە زانکۆ حکومییەکان، زیاتر لە 60 هەزار کورسی تەرخانکراوە، هەموو ئەو دەرچووانەی داواکاری پێشکەش دەکەن لە زانکۆ حکومییەکان وەردەگیرێن.

زانیاریی زیاتر: دەرچووانی پۆلی 12ـی ئامادەیی ناوچە کوردستانییەکانی دەرەوەی ئیدارەی هەرێمی کوردستان کورسی تایبەتیان بۆ تەرخان کراوە و لە ڕێگەی لینکێکی تایبەت داواکاری پێشکەش دەکەن و لە زانکۆ حکومییەکانی هەرێمی کوردستان وەردەگیرێن.

گۆشەیەکی دیکەی دیمەنەکە: لە چوارچێوەی بڕیاری ئاڵوگۆڕی وەرگرتنی قوتابیان لە زانکۆکانی هەرێمی کوردستان و عێراق، ئەمساڵ 400 قوتابی باشوور و ناوەڕاستی عێراق بۆ خوێندنی بەکالۆریۆس لە زانکۆ حکومییەکانی هەرێمی کوردستان وەردەگیرێن.