سلێمانی دەبێتە خاوەنی کۆڕنیشێکی گەشتیاریی نوێ لەسەر چەمی قلیاسان

ئاڤا نیوز

 

لە هەنگاوێکی نوێدا بۆ پەرەپێدانی کەرتی گەشتیاری و گرنگیدان بە سەرچاوەکانی ئاو، پڕۆژەی دروستکردنی کۆڕنیش لەسەر چەمی قلیاسان لە سلێمانی دەستی پێ کرد، کە بە یەکێک لە پڕۆژە ستراتیژییەکانی کابینەی نۆیەمی حکومەتی هەرێمی کوردستان دادەنرێت.

 

لێدوانی فەرمی: بێگەرد تاڵەبانی، وەزیری کشتوکاڵ و سەرچاوەکانی ئاو، لە لێدوانێکیدا بۆ ئاڤا نیوز ڕایگەیاند، ئەم پڕۆژەیە لەسەر بودجەی پارێزگای سلێمانی جێبەجێ دەکرێت و ئامانج لێی کردنی ناوچەکەیە بۆ شوێنێکی گەشتیاریی سەرنجڕاکێش.

بە وتەی وەزیری کشتوکاڵ، کۆڕنیشەکە لەسەر بەنداوی چەق چەق دروست دەکرێت و دیزاینی پڕۆژەکە لەلایەن دەستەی گەشتوگوزار و بە هەماهەنگیی لەگەڵ شارەوانیی سلێمانی تەواو کراوە. ئاماژەی بەوەش کرد کە ماوەی جێبەجێکردنی پڕۆژەکە نزیکەی دوو ساڵ دەخایەنێت و دوای تەواوبوونی، سیمایەکی زۆر جوان بە ناوچەی قلیاسان و شاری سلێمانی دەبەخشێت.

 

بەنداوی چەق چەق، کە لە ساڵی 2006 و دوای ماوەیەکی کەم لە تەواوبوونی بەهۆی لافاوەوە ڕووخا، دوای نزیکەی 18 ساڵ جارێکی دیکە لەسەر بڕیاری کابینەی نۆیەمی حکومەتی هەرێم دەست بە دروستکردنەوەی کراوە. پڕۆژە نوێیەکە بە دیزاینێکی پێشکەوتووتر جێبەجێ دەکرێت، کە توانای گلدانەوەی ئاوی لە سێ ملیۆن مەتر سێجاوە بۆ نۆ ملیۆن مەتر سێجا زیاد کردووە.

شێوازی جێبەجێ کردن؛ لەناو ڕێڕەوە ئاوییەکەیدا، شەش حەوزی تایبەت بە گلدانەوەی ئاو دروست دەکرێت کە جگە لە سوودی کشتوکاڵی و ژینگەیی، جوانییەکی تایبەت بە پڕۆژە گەشتیارییەکە دەدات.ئەم پڕۆژەیە نەک تەنها بۆ گلدانەوەی ئاو، بەڵکو بۆ بووژاندنەوەی کەرتی بەخێوکردنی ماسی و پاراستنی ژینگەی چەمی قلیاسان سوودی گەورەی دەبێت.

بێگەرد تاڵەبانی جەختی لەوە کردەوە کە لە کارنامەی کابینەی نۆیەمدا، گلدانەوەی ئاو و پاراستنی ئاسایشی ئاو لەپێشینەی کارەکان بووە. لەم چوارچێوەیەدا، هەشت بەنداو تەواو کراون کە توانای گلدانەوەی نزیکەی 160 ملیۆن مەتر سێجا ئاویان هەیە.

هەروەها، کارکردن لەسەر دروستکردنی 12 بەنداوی دیکە بەردەوامە. وەزیری کشتوکاڵ ئاماژەی بە هەماهەنگی لەگەڵ حکومەتی فیدراڵی عێراق کرد بۆ دروستکردنی چوار بەنداوی گەورەی ستراتیژی لە هەرێمی کوردستان، کە سوودی بۆ تەواوی عێراق دەبێت.