قۆناغی یەکەمی پڕۆژەی کۆڕنیشی کەلار تەواو دەکرێت

ئاڤا نیوز

کۆڕنیشی کەلار لەلایەن کۆمپانیای مارێنا جێبەجێ دەکرێت، کارکردن لە پڕۆژەکە بەردەوامە، بە تەواوبوونیشی سوودێکی زۆری گەشتیاری بۆ کەلار و ئیدارەی سەربەخۆی گەرمیان دەبێت و ئابووری ناوچەکە زیاتر دەبوژێتەوە.

چیرۆکی سەرەکی: کۆڕنیشی کەلار  بە درێژایی هەزار و 400 مەتر دروست دەکرێت، لە قۆناغی یەکەمدا 500 مەتر تەواو دەکرێت، لە ئیستادا ڕۆژانە 100 ئامێر کاری تێدا دەکات، لە ماوەیەکی نزیکدا قۆناغی یەکەمی تەواو دەبێت، پارک و باخچە و سەوزایی و شوێنی پیادەڕۆیی و پایسکلسواری و شەقامی 30 مەتری بەشێک لەو خزمەتگوزارییانەن کە لە داهاتوودا دەخرێنە خزمەتی هاووڵاتیان.

لێدوانی فەرمی: هۆشمەند عوسمان، بەڕێوەبەری پڕۆژەی کۆڕنیشی کەلار بە ئاڤا میدیای ڕاگەیاند، کارکردن لە کۆڕنیشەکە بەردەوامە، لەماوەیەکی نزیک قۆناغی یەکەمی کۆڕنیشەکە تەواو دەبێت کە نزیکەی 500 تا 600 مەتر دەبێت هاووڵاتیان دەتوانن سوودی لێوەربگرن و سەردانی بکەن، داوا لە حکومەتی هەرێمی کوردستان دەکەین بەربەستەکان لاببرێت بۆ ئەوەی بتوانین قۆناغی دووەمی کۆڕنیشەکە تەواو بکرێت.

ئەوەی پێویستە بیزانیت: تەواوکردنی بەشی دووەمی کۆڕنیشەکە یەک گرفتی هەیە، خاوەنی كارگەیەكی چەو و لم کە دەكەوێتە ئەوبەری ڕووباری سیروان، ڕێگری لە تەواوكردنی پڕۆژەكە دەكات، چونکە دیوارێکی راگر لە کۆڕنیشەکە دروست دەکرێت، بە بیانووی ئەوەی دروستكردنی ڕاگرەکە زیان بە كارگەكە دەگەێنێت، ڕازی نییە دروست بکرێت.

بۆ چارەسەرکردنی گرفتەکە لیژنەیەک پێکهێنراوە و لە هەوڵدان چارەسەرێکی گونجاوی بۆ بدۆزنەوە.

زانیاریی زیاتر: کۆڕنیشەکە لە ساڵی 2021 دەستکراوە بە دروستکردنی، گوژمەی نزیکەی 10 بۆ 12 ملیار دیناری بۆ دانراوە، پرۆژه‌كه‌ش تێكه‌ڵه‌یه‌ كه‌ خۆی له‌ دروستكردنى بڕگه‌ى خزمه‌تگوزاریی وه‌كو کۆڕنیش و باخچه‌ و هه‌روه‌ها دروستكردنى یه‌كه‌ى نیشته‌جێبون و پرۆژه‌ى بازرگانییدا ده‌بینێته‌وه‌.