سەرۆکی پەرلەمانی تورکیا: دوای چەکدانانی تەواوەتی پەکەکە، زەمینەسازی یاسایی بۆ پرۆسەی ئاشتی دەڕەخسێنرێت

ئاڤا نیوز

سەرۆکی پەرلەمانی تورکیا ئاماژە بەوە دەدات بەمزووانە قۆناغی یەکەمی کارەکانی کۆمیسیۆنە پەرلەمانییەکە تەواو دەبن و دەڵێت، دوای چەکدانانی تەواوەتی پەکەکە، داوا لە پەرلەمان دەکەین زەمینەسازی یاسایی بۆ پرۆسەی ئاشتی بڕەخسێنێت.

وێنە گەورەکە: کۆمیسیۆنی یەکڕیزی نیشتمانی، برایەتی و دیموکراسی کە لە لە 01-08-2025 پێکهێنراوە بۆ پڕۆسەی ئاشتی لە تورکیا تاکوو ئێستا 13 کۆبوونەوەی ئەنجام داوە، بەڵام بە هۆی ئەوەی لە 31-07-2025 ـەوە تاکوو 01-10-2025 پەرلەمان لە پشوودا بوو، نەیتوانی هیچ پڕۆژەیاسایەک پێشکەشی سەرۆکایەتیی پەرلەمانی تورکیا بکات.

لێدوانی فەرمی: نومان کورتوڵموش لەبارەی پرۆسەی چەکدانانی پەکەکە ڕایگەیاند: ئێمە بە نزیكەی نۆ مانگ گەیشتووین بەو ئەنجامەی وڵاتانی دیکە بە پێنج بۆ دە ساڵ پێیگەیشتوون.

بە تەنیشت ئەو بابەتەوە: نومان کورتوڵموش لەبارەی کارەکانی کۆمیسیۆنەکەشەوە کە بۆ ڕەخساندنی زەمینەسازی یاسایی بۆ پرۆسەکە لە 01-08-2025 ـەوە بە بەشداری 11 حیزبی کاریگەری تورکیا پێکهێنراوە و خۆی سەرۆکایەتی دەکات، دەڵێت: "بەمزووانە قۆناغی یەکەمی کارەکانی کۆمیسیۆنە پەرلەمانییەکە کە گوێگرتن بووە لە سەرنج و پێشنیازەکانی چین و توێژە جیاوازەکان تەواو دەبن".

ئەوەی پێویستە بیزانیت: سەرۆکی پەرلەمانی تورکیا سەرنج دەخاتە سەر ئەوەی دوای چەکدانانی تەواوەتی پەکەکە، داوا لە پەرلەمان دەکەن تاکو لە ڕێگای هەموارکردنەوەی ژمارەیەک لە یاساکانەوە، زەمینەسازی یاسایی بۆ پرۆسەی ئاشتی بڕەخسێنێت.