ساڵح موسلیم: ئۆجەلان داوای چەکدانان لە هەسەدە ناکات و ڕۆژئاوا لای ئەو هێڵی سوورە

ئاڤا نیوز

ئەندامێکی دەستەی سەرۆکایەتیی پەیەدە ئاماژە بەوە دەدات، ئۆجەلان بە دەم دوایین داواکاری دەوڵەت باخچەلییەوە نایەت و داوا لە هەسەدە ناکات چەک دابنێت و خۆی بەدەستەوە بدات.

چیرۆکی سەرەکی: دوای نزیکەی یەک ساڵ بەسەر داواکارییەکەی یەکەمیدا کە داوای لە عەبدوڵڵا ئۆجەلان کرد پەکەکە هەڵبوەشێنێتەوە و چەکی پێدا بنێت، دوێنێ دەوڵەت باخچەلی، سەرۆکی گشتیی مەهەپە داوای لێ کرد چەک بە هەسەدەش دابنێت و ڕازی بکات بە تێکەڵبوون لەگەڵ سوپای نوێی سووریا.

لێدوانی فەرمی: ساڵح موسلیم، ئەندامی دەستەی سەرۆکایەتیی پەیەدە لە چاوپێکەوتنێکدا ئاماژە بەوە دەدات ئەوان زۆر ڕێز لە ئۆجەلان دەگرن و ئۆجەلانیش بە هەمان شێوە ڕێزیان لێ دەگرێت، بەڵام داوایان لێ ناکات خۆیان بە دەستەوە بدەن و چەک دابنێن.

ساڵح موسلیم ئاماژە بەوە دەدات ئۆجەلان بەوانەی وتووە کە سەردانیان کردووە ڕۆژئاوای کوردستان لای ئەو هێڵی سوورە و باوەڕ ناکات داواکارییەکی لەم جۆرە لە هەسەدە بکات.

ئەوەی پێویستە بیزانیت: موسلیم بە پێویستی دەزانێت دۆخی هەسەدە لەگەڵ پرۆسەی ئاشتیی لە تورکیا و چەکدانانی پەکەکە تێكەڵ نەکرێن و دەڵێت، ئێمە هەرگیز هیچ جۆرە چالاکییەکانمان لە دژی تورکیا ئەنجام نەداوە و ئەنجامیشی نادەین. دەمانەوێت پەیوەندی دۆستانەمان لەگەڵ تورکیادا هەبێت.