ئاڤای خەڵک؛ دانیشتووانی گەڕەکێکی دووکان 32 ساڵە چاوەڕوانی قیرتاوکردنی کۆڵانەکانیان دەکەن

ئاڤا نیوز

گەڕەکی سەرچەم لە قەزای دووکان، لە ساڵی 1993 ـەوە دروست کراوە، بەڵام تا ئێستا شەقامەکانی قیرتاو یان کۆنکرێت نەکراون و هەر خۆڵە، دانیشتووانی گەڕەکەکە لە ڕێگەی ئاڤاوە داوای چارەسەری کێشەکەیان دەکەن.

زانیاریی بەدەستهاتوو: دارەوان ڕەسوڵ، یەکێک لە دانیشتووانی گەڕەکی سەرچەم، بە ئاڤای وت، "من منداڵیم لەم گەڕەکە بەسەر بردووە، بستێک قیر و کۆنکرێتم لە کۆڵانەکانماندا نەبینی. هاوینان تەپوتۆز و زستانان قوڕ و لیتە ژیانمان دژوار دەکات." چەندینجار داوامان لە شارەوانی کردووە، وەڵاممان وەرنرگرتووە.

لێدوانی فەرمی: سەروەر ساڵح، سەرۆکی شارەوانی دووکان، بە ئاڤای ڕایگەیاند: "هەموو ڕێکارەکانی دەستپێکردن بە کۆنکرێتکردنی ئەو چەند کۆڵانە تەواو بووە. تەنانەت چەکی بانکەکەش نێردراوە و ڕەزامەندی لەسەر دراوە، تەنیا چاوەڕوانی ئەوەین پارەکەمان بۆ سەرف بکرێت، ڕاستەوخۆ دەست دەکەین بە کۆنکرێتکردن."