عەقید سەفین تاهیر: ساڵ بە ساڵ تووندوتیژی خێزانی كەمتر دەبێتەوە

ئاڤا نیوز

بەڕێوەبەری بەرەنگاربوونەوەی تووندوتیژیی خێزانی لە هەولێر ڕایدەگەیەنێت، ئامارەكان پێمان دەڵێن؛ ڕێژەی تووندوتیژیی خێزانی و جیابوونەوەی هاوسەران، ساڵ لەدوای ساڵ بەرەو دابەزین دەچێت، لە هەمان كاتدا ڕێژەی ئاشتبوونەوەی خێزانان بەرەو هەڵكشانە.

چیرۆكی سەرەكی: حكومەتی هەرێمی كوردستان، لەماوەی سێ ساڵی ڕابردوودا، پلانێكی ستراتیژی بۆ سنوورداركردنی تووندوتیژی خێزانی داڕشتووە؛ لەڕێگەی هەماهەنگی دەزگا پەیوەندیدارەكان و بەشداری كارای مامۆستایانی ئایینی، ڕێنماییكارانی پەروەردەیی، ڕاوێژكارانی كۆمەڵایەتی لە نووسینگەكانی بەرەنگاربوونەوەی تووندوتیژی خێزانی، ڕاوێژكارانی دەروونی.

لێدوانی فەرمی: عەقید سەفین تاهیر، بەڕێوەبەری تووندوتیژیی خێزانی لە هەولێر تایبەت بە ئاڤا ڕایگەیاند، بەگوێرەی ئامارە بەراوردكارییەكانی نێوان ساڵانی 2022 تاوەكو شەش مانگی یەكەمی ئەمساڵ، خۆشبەختانە ئامارەكانی تووندوتیژیی خێزانی، ساڵ لەدوای ساڵ ڕووی لە دابەزین كردووە. ئەو شوێنانەی نووسینگەكانی بەرەنگاربوونەوەی تووندوتیژی خێزانی لێ نزیكە، تووندوتیژی خێزانی بەڕێژەی 5.7% ڕووی لە دابەزین كردووە.

عەقید سەفین تاهیر لەبارەی ئامارەكانی جیابوونەوەی هاوسەران دەڵێت، تەنیا لە پارێزگای هەولێر لە ساڵی 2024، هەزار و 979 حاڵەتی جیابوونەوەی كەمتر بەراورد بە ساڵی 2023 تۆماركراوە.

ئەوەی پێویستە بیزانیت: سەنتەرەكانی ڕاوێژكاریی كۆمەڵایەتی لەنێو نووسینگەكانی بەرەنگاربوونەوەی تووندوتیژیی خێزانی، كار بۆ چارەسەركردنی كێشە و گرفتی نێو خێزانەكان دەكەن بەر لەوەی دۆسیەكانیان بگاتە دادگا، لەو سەنتەرانە ڕێنمایی كۆمەڵایەتی، دەروونی و یاسایی بە هاوسەران و ئەندامانی خێزان دەدرێت لەبارەی دەرئەنجامە نەرێنییەكانی تێكچوونی خێزان و جیابوونەوەی هاوسەران.