هەرێمی كوردستان هاوردەكردنی مریشكی هێلكەكەر و جۆرێک هێلکە لە ئێرانەوە قەدەغە دەكات

ئاڤا نیوز

بە هۆی بڵاوبوونەوەی نەخۆشیی ئەنفلەوەنزای پەلەوەر لە ئێران، هەرێمی كوردستان هاوردەكردنی مریشكی هێلكەكەر و هێلكەی تروكاندن و چەند بەرهەمێكی دروستكراو لە گۆشتی مریشك لەو وڵاتەوە قەدەغە دەكات.

وێنە گەورەكە: ئێران بە فەرمی ڕێكخراوی تەندروستیی جیهانیی لە بڵاوبوونەوەی نەخۆشیی ئەنفلەوەنزای پەلەوەر لە كێڵگە پەلەوەرییەكانی وڵاتەكەی ئاگادار كردووەتەوە ئەمەش وای كرد بەشێك ئەو وڵاتانەی مریشك و بەرهەمە پەلەوەرییەكانیان لە ئێرانەوە هاوردە دەكرد قەدەغەی بكەن.

لێدوانی فەرمی: د. فیراس سدیق، بەڕێوەبەری سامانی ئاژەڵ لە وەزارەتی كشتوكاڵی هەرێمی كوردستان بە ئاڤا میدیای ڕاگەیاند: ئێمە لە ساڵی 2019ەوە هاوردەكردنی مریشكی زیندوو و مریشكی بەستوو و هێلكەی خواردن و پارچەكانی مریشكمان قەدەغە كردووە، بەڵام هاوردەكردنی مریشكی 90 ڕۆژە كە پێی دەگوترێت مریشكی هێلكەكەر و هێلكەی تروكاو و چەند بەرهەمێكی دیكە كە لە گۆشتی مریشك دروست دەكرێن ئاسایی بوو بەڵام بەهۆی بڵاوبوونەوەی ئەنفلەوەنزای پەلەوەر لە ئێران، ماوەی دوو ڕۆژە هاوردەكردنی هەموو ئەو بەرهەمانەشمان قەدەغە كردووە.

زانیاریی زیاتر: بەڕێوەبەرەكەی وەزارەتی كشتوكاڵ دڵنیاییشی دا كە قەدەغەكردنی ئەو بەرهەمانە كاریگەریی ئەوتۆی لەسەر بازاڕەكانی هەرێمی كوردستان نابێت دەتوانرێت لە ناوخۆش قەرەبوو بكرێتەوە، سەبارەت بە كێڵگە پەلەوەرییەكانی هەرێمی كوردستانیش دڵنیایی دا كە پارێزراون لە نەخۆشییەكە.