کشتوکاڵی هەولێر؛ بەربەستی بازگەكان بۆ هەناردەكردنی بەرهەمی ڕووەكیی هەرێمی كوردستان چارەسەر كراوە

ئاڤا نیوز

 

بەڕێوەبەری گشتیی كشتوكاڵی هەولێر ڕایدەگەیێنێت، گرفتی تێپەڕبوونی بەرهەمە كشتوكاڵییەكانی هەرێمی كوردستان لە بازگەكانی سەر بە حکومەتی عێراق تا ڕاددەیەك چارەسەر بووە و ئێستا ڕۆژانە 200 بارهەڵگر بەرهەمی ڕووەكی بەرەو پارێزگاكانی ناوەڕاست و خوارووی عێراق هەناردە دەكرێت.

 

وێنە گەورەكە: هەردوو وەزارەتی كشتوكاڵی هەرێمی كوردستان و عێراق، ڕێككەوتن لەسەر لابردنی گرفت و بەربەستەكانی بەردەم هەناردەكردنی بەرهەمە كشتوكاڵییەكانی پارێزگاكانی هەرێمی كوردستان بەرەو شارەكانی ناوەڕاست و خوارووی عێراق لە بازگەكان، ئێستا ڕۆژانە بەرهەم و كاڵاكان هەناردە دەكرێت.

 

لێدوانی فەرمی: هێمن سەید موراد، بەڕێوەبەری گشتیی كشتوكاڵی هەولێر تایبەت بە ئاڤا وتی، ئێستا بەرهەمە ڕووەكییەكان بەشێوەیەكی ئاسایی لە بازگەكانەوە بەرەو ناوچەكانی دیكەی عێراق دەنێردرێت و ڕۆژانە 200 بارهەڵگر بەرهەمە جۆراوجۆرەكان هەناردە دەكرێت، بەڵام لە هەناردەكردنی بەرهەمی ئاژەڵی؛ گۆشتی مریشك و هێلكەی خواردن، هێشتا گرفت و ڕێگرییەكان بەردەوامن.

زانیاریی زیاتر: بەڕێوەبەری كشتوكاڵی هەولێر ئاماژەی بەوەكرد، لە بازگەكان داوای ڕسومات و باج دەكەن بێ ئەوەی هیچ بنەمایەكی یاسایی هەبێت، یاخود بە ئەنقەست دەربازبوون لە بازگەكان درەنگ دەخەن، ئەمەش هەندێكجار زیان بە بەرهەمە ئاژەڵییەكان دەگەیێنێت.

 

باسی لەوەشكرد، سەرەڕای ڕێككەوتنی هەردوو حكومەتی هەرێمی كوردستان و حكومەتی فیدڕاڵ لەسەر لابردنی بەربەستەكانی بەردەم هەناردەكردنی بەرهەمە كشتوكاڵییەكان، بەڵام بازگەكان وەك پێویست پابەندی بڕیار و ڕێككەوتنەكان نین و بەردەوام گرفت بۆ ئەو بارهەڵگرانە دروست دەكەن كە هێلكە یاخود گۆشتی مریشك بەرەو پارێزگاكانی عێراق دەگوازنەوە.