لە هەشت مانگدا نزیکەی سێ هەزار تووشبووی نوێی شێرپەنجەی مەمک لە هەولێر تۆمار کراون

ئاڤا نیوز

 

بەگوێرەی ئامارەکان لە ساڵی 2024 نزیکەی پێنج هەزار تووشبووی شێرپەنجە لە هەولێر تۆمار کراون، لەو ڕێژەیەش نزیکەی 72%ـی دانیشتووانی سنووری پارێزگای هەولێرن.

 

چیرۆکی سەرەکی:  مانگی 10ـی هەموو ساڵێک لەلایەن ڕێکخراوی تەندروستیی جیهانییەوە بۆ بەرەنگاربوونەوە و هۆشیاریی شێرپەنجەی مەمک دیاریکراوە، لە سەرانسەری جیهاندا هەڵمەتەکە بەڕێوەدەچێت، لە هەرێمی کوردستانیش ساڵانە بەشێوەیەکی بەرفراوان لە ڕێگەی کۆڕ و سیمینار و کۆنفرانسەوە هۆشداریی و زانیاری بە هاووڵاتیان دەدرێت بە تایبەت ئافرەتان.

 

لێدوانی فەرمی: د. دڵۆڤان محەممەد، بەڕێوەبەری گشتیی تەندروستیی هەولێر دەڵێت، ساڵانە لە هەرێمی کوردستان هەڵمەتی بەرەنگاربوونەوەی هۆشیاریی شێرپەنجە بەڕێوەدەچێت، کە تیایدا هۆشیاری و زانیاریی بە هاووڵاتیان دەدرێت، تیمەکانمانیشمان بە درێژایی ئەو مانگە لە شار و شاروچکەکان ڕێنمایی و هۆشیاری بە خەڵک دەدەن، هاوکات سەنتەری تایبەت بۆ پشکینی پێشوەختە کراوەتەوە و پشکنینی شێرپەنجەی مەمک لەلایەن 13 پزیشکی پسپۆڕەوە بۆ هاووڵاتیان ئەنجام دەدرێت، هاووڵاتیان دەتوانن سەردانی سەنتەرەکە بکەن، حەوت پزیشکی پسپۆڕی نەشتەرگەریی و شەش پزیشکی پسپۆڕی سۆنار، ڕۆژانە پشکنینی هاووڵاتیان دەکەن و چارەسەریان پێدەدەن. 

 

زانیاریی زیاتر: د. دڵۆڤان محەممەد، دەڵێت، بەپێی ئەو ئامارەی لە نەخۆشخانەکمان تۆمار کراوە لە ساڵی 2024 نزیکەی پێنج هەزار تووشبووی شێرپەنجە لە هەولێر تۆمار کراوە، لەو ڕێژەیە نزیکەی 72%ـی دانیشتووانی سنووری پارێزگای هەولێرن، ئەوانی دیکە خەڵکی پارێزگاکانی خواروو و ناوەڕاستی عێراقن، هاوکات لە هەشت مانگی ئەمساڵ دوو هەزار و 728 تووشبووی شێرپەنجە لە هەولێر تۆمار کراوە.

 

ئەوەی پێویستە بیزانیت: بەمەبەستی هۆشیاریی و بەئاگابوونی پێشوەختەی هاووڵاتیان، وەزارەتی تەندروستیی کوردستان لە ڕێگەی تیمە گەڕۆکەکانی سەر بە بەڕێوەبەرایەتیی گشتیی تەندروستیی هەولێر، بەشی پاراستنی تەندروستی، لە دەرەوەی نەخۆشخانە پشکنین و سۆنار بۆ ئەو کەسانە ئەنجام دەدەن کە دەیانەوێت لە دۆخی تەندروستی خۆیان دڵنیا بن.

 

باکگراوند: بەپێی ئامارێكی وەزارەتی تەندروستیی هەرێمی كوردستان، تەنیا لە ساڵی 2023دا لە كوردستان نۆ هەزار 911 تووشبووی شێرپەنجە تۆمار كراون، 55٪ـیان لە ڕەگەزی مێن و زۆرترینیان تەمەنیان لە نێوان 51 بۆ 60 ساڵی بووە، تووشبووانی شێرپەنجەی پارێزگاكانی تری عێراق 18.19%ـی نەخۆشانی شێرپەنجەی كوردستان پێكدەهێنن، بۆیە بەو ڕێژەوە لە هەرێمی كوردستان لە ساڵی 2012ـوە تا ساڵی 2023، نزیکەی 81 هەزار و 62 نەخۆش تۆمار كراون.