شەقامێكی 60 مەتری لە هەولێر دروست دەكرێت؛ هەردوو شەقامی 120 و 150 بەیەكەوە دەبەستێتەوە

ئاڤا نیوز

 

ئەمڕۆ لە شاری هەولێر، بەردی بناغەی پرۆژەیەكی گرنگی ڕێگاوبان دانرا، ئەویش دروستكردنی شەقامێكی 60 مەترییە بە درێژی چوار هەزار و 800 مەتر كە هەردوو شەقامی 120 مەتری و 150 مەتری بەیەكتری دەبەستێتەوە.

 

لێدوانی فەرمی: كارزان هادی، سەرۆكی شارەوانیی هەولێر بە ئاڤای ڕاگەیاند، شەقامەكە دەكەوێتە نێوان گوندی ئارام-1 و شاری ئاتكۆنز، درێژییەكەی چوار هەزار و 800 مەترە، جگە لە شەقامەكەش، سیستمی ئاوەڕۆی لوولەیی لە هەردوو سایدی شەقامەكە دادەنرێت بە مەودای 15 كیلۆمەتر. 

 

زانیاریی زیاتر: پرۆژەكە لەسەر بوودجەی وەزارەتی شارەوانی و گەشتوگوزار بە گوژمەی زیاتر لە 36 ملیار دینار لەلایەن كۆمپانیای (دۆیچ فلەوەر) جێبەجێ دەكرێت، ماوەی ساڵێك و سێ مانگ بۆ تەواوكردنی پرۆژەكە دانراوە و، كوالێتی ستانداردی سەردەمیانە لەدروستكردنی لەبەرچاودەگیرێت و زیاتر لە 400 ئەندازیار و كرێكار و ئامێری جۆراوجۆر، لە پرۆژەكەدا كار دەكەن.

 

لەلایەكی دیكەوە: ساسان عەونی، وەزیری شارەوانی و گەشتوگوزار لە كۆنفرانسێكی ڕۆژنامەوانی ڕایگەیاند، گرنگیی شەقامەكە لەوەدایە، فشار و جەنجاڵی لەسەر ئەو شەقامە سەرەكییانە كەم دەبێتەوە كە هەردوو شەقامی 120 مەتری و 150 مەتری بەیەكتری دەبەستێتەوە، جگە لە سوودی بۆ گەڕەكەكانی دەوروبەری شەقامەكە، سوودی بۆ تێكڕای دانیشتووانی هەولێر دەبێت. لە ئاییندەشدا چەندین شەقامی نوێی هاوشێوە دروست دەكرێت.

بۆچی گرنگە: شەقامەكە جگە لەوەی هەردوو شەقامی خێرای 120 مەتری و 150 مەتری بەیەكتری دەبەستێتەوە، ئاسانكاری زۆر بۆ هاتووچۆی شۆفێران دەكات، بەوپێیەی فشار و جەنجاڵی لەسەر شەقامی سەرەكیی هەولێر- شەقڵاوە لەلایەك و شەقامی هەولێر-بەحركە لەلایەكی دیكەوە، كەم دەبێتەوە.