کارەبای زاخۆ بەشێوەیەکی ئەزموونی بووەتە 24 کاتژمێری

ئاڤا نیوز

لە ڕۆژی هەینییەوە کارەبای زاخۆ بووەتە 24 کاتژمێری پڕۆژەی ڕووناکی، تاوەکو پێنج ڕۆژی دیکەش بەشێوەیەکی ئەزموونی لەژێر  تاقیکردنەوە دەبێت، تاوەکو کێشەکانی دیاری بکرێت.

وێنە گەورەکە: تیمەکانی پڕۆژەی ڕووناکی، کارەکانی لە زاخۆ تەواو کردووە، ئێستا کارەبای 24 کاتژمێری وەک ئەزموونی لە سەنتەری قەزای زاخۆ دەستیپێکردووە، لە دوێنێوە تا ئێستا هیچ گرفتێک ڕووی نەداوە، تەنیا لە چەند شوێنێک بۆ ماوەی سێ خولەک کارەبا بڕاوە و دواتر کێشەکە چارەسەر کرا، کارەبای زاخۆ تاوەکو پێنج ڕۆژی دیکەش بەشێوەی ئەزموونی دەبێت تاوەکو کێشە و گرفتەکانی دیاری بکرێت و چارەسەری دیاری بکرێت.

زانیاریی پەیامنێر: جاسم محەممەد، پەیامنێری ئاڤا لە زاخۆ ڕایگەیاند: لەدوای کاتژمێر 12ـی نێوەڕۆی هەینی کارەبای زاخۆ بووەتە 24 کاتژمێری و مۆلیدەکان کوژاونەتەوە، بڕیاربوو تاوەکو 10 ڕۆژی دیکە بەشێوەی ئەزموونی پڕۆژەی ڕووناکی جێبەجێ بکرێت، بەڵام دواتر کرایە پێنج ڕۆژ ئەگەر کێشەی نەبێت پڕۆژەکە بە فەرمی ڕادەگەێنرێت.

زانیاریی زیاتر: پێشتر بەهۆی دەنگ و دووکەڵی مۆلیدەکانەوە خەڵک بێزار ببوون، بەڵام ئێستا دۆخەکە گۆڕاوە و هاووڵاتییان بە ئاسوودەی و کارەبایەکی پاک سوودمەند بوونە لە پڕۆژەی ڕووناکی.

ئەوەی پێویستە بیزانیت: لە سنووری ئیدارەی سەربەخۆی زاخۆ، نزیکەی 80 هەزار هاوبەشی کارەبا هەن، کە بریتین لە ماڵ و شوێنە بازرگانییەکان، بڕیارە لەماوەیەکی نزیکدا پڕۆژەی ڕوونکای هەموو شوێنە بازرگانییەکان و بازاڕەکانیش بگرێتەوە.