لە زاخۆ جگە لە پارتی هیچ لایەنێكی دیكە كاندیدی بۆ هەڵبژاردن نییە

ئاڤا نیوز

لە ئیدارەی سەربەخۆی زاخۆ، جگە لە لیستی 275ـی پارتی دیموكراتی كوردستان، هیچ حیزب و لایەنێكی دیكە كاندیدی بۆ هەڵبژاردنی پەرلەمانی عێراق نییە، بەرپرسی لقی (8)ـی پارتی لە زاخۆ وەڵامی ئەو حاڵەتە دەگمەنە دەداتەوە.

لێدوانی فەرمی: عومەر ئۆرەیی، بەرپرسی لقی (هەشت)ـی پارتی لە زاخۆ، تایبەت بە ئاڤا ڕایگەیاند، خەڵكی زاخۆ لەسەر بنەمای جێبەجێكردنی پرۆژە و گەیاندنی خزمەتگوزاری و ڕەخساندنی دەرفەتی كار و ئاوەدانكردنەوە، دەنگ دەدات؛ بۆ هەموو لایەنەكانی دیكەش یەكلا بۆتەوە كە جگە لە پارتی، هیچ حیزب و لایەنێكی لە زاخۆ سەركەوتوو نابێت بۆیە هیچ كاندیدیان نییە.

بەرپرسی لقی هەشتی پارتی دڵنیایی دا لەوەی، متمانەی تەواویان بە كاندیدەكانیان هەیە كە دەنگی پێویست بەدەستبهێنن و بۆ ئەندامی پەرلەمانی عێراق دەربچن.

لەلایەكی دیكەوە: ئۆرەیی باس لەوەش دەكات، جگە لەو پرۆژە ستراتیژی و گەورانەی لە ئیدارەی سەربەخۆی زاخۆ جێبەجێ كراون، سوپڕایزی دیكەشیان بۆ دەڤەری پردی دەلال هەیە؛ لە بوارەكانی ڕەخساندنی دەرفەتی كار، برەودان بە كەرتی كشتوكاڵ و بازرگانی و گەشتوگوزار.

هەر ئەمڕۆش بەشێوەیەكی فەرمی ڕاگەیێنرا، پرۆژەی كارەبای 24 كاتژمێری گەیشتە ئیدارەكە. هەموو ئەو گەشەسەندن و پێشكەوتنەی لە ئیدارەی زاخۆ كراون، وایكردووە، هاونیشتمانیانی ئەو سنوورە لەو هەڵبژاردنە بە گڕوتینی زیاترەوە بەشداری هەڵبژاردن بكەن و لیستی 275ـی پارتی دیموكراتی كوردستان سەربخەن.

ئەوەی پێویستە بیزانیت: پارتی لە ئیدارەی زاخۆ چوار كاندیدی هەیە؛ سێ پیاو و یەك خانم، دیاریكردنی كاندیدەكان لەسەر بنەمای زمانزانی، شارەزابوون لە یاسا، بوێری و ڕاستگۆیی، داكۆكیكردن لە قەوارەی هەرێمی كوردستان و مافەكانی خەڵكی كوردستان، دیاریكراون.