زیاتر لە 15٪ـی کارەکانی بەنداوی دوین جێبەجێ کراون

ئاڤا نیوز

کارکردن لە بەنداوی دوین بەردەوامە و تا ئێستا لە 15%ـی کارەکانی بەنداوەکە جێبەجێ کراون.

وێنە گەورەکە: لە پێناو مسۆگەرکردنی ئاسایشی ئاو و ڕووبەڕووبوونەوەی گۆڕانی کەشوهەوا و گرنگیدان بە کشتوکاڵ و ئاژەڵداری، کابینەی نۆیەمی حکومەتی هەرێمی کوردستان گرنگی تایبەتی بە بەهێزکردنی ژێرخانی ئاو داوە و ژمارەیەک پۆند و بەنداوی دروست کردووە، ژمارەیەکیش لە باری جێبەجێکردنن.

لێدوانی فەرمی: عەبدوڵڵا گەردی، بەڕێوەبەری جێبەجێکاری بەنداوی دوین بە ئاڤا میدیای گوت: کارکردن لە بەنداوی دوین بەبێ هیچ کێشەیەک بەردەوامە و تا ئێستا زیاتر لە 15%ی کارکردن تەواو کراون.

زانیاریی زیاتر: بەنداوی دوین، بە شێوازی كۆنكرێتیی ئاڕ سی سی دروست دەكرێت، 75 مەتر بەرز و 320 مەتر درێژ دەبێت، توانای گلدانەوەی 100 ملیۆن مەترسێجا ئاوی دەبێت.

بۆچی گرنگە: تەواوکردنی ئەم بەنداوە گرنگی زۆری دەبێت بۆ بووژانەوەی ئاوی ژێرزەوی و پەرەپێدانی کشتوکاڵ و بەخێوکردنی ئاژەڵ لەو سنوورە، لەهەمان کاتیشدا کاریگەریی لەسەر زیاترکردنی جووڵەی گەشتیاری دەبێت، چونکە دوین شوێنەواری مێژوویی کۆنی لێیە و سرووشتێکی جوانی هەیە. 

ئەمەش بزانە: ناوچەی شوێنەواریی دوین، 40 كیلۆمەتر لە باكووری شاری هه‌ولێرەوە دوورە، دەكەوێتە سەر ده‌ربه‌ندی كۆڕێ؛ مێژووی قه‌ڵای دوین‌‌ دەگەڕێتەوە بۆ سەدەی شانزەیەمی زایینی.

باکگراوند: ڕۆژی دووشەممە 16-9-2025، سەرۆکوەزیران مەسرور بارزانی، بەردی بناغەی بەنداوی دوینی لە پارێزگای هەولێر دانا.