بەمەبەستی چارەسەرکردنی گرفتی کەمئاوی پرۆژەی ئاوی دەربەندیخان تەواو دەکرێت

ئاڤا نیوز

کارکردن لە پرۆژەی ئاوی دەربەندیخان دەست پێدەکاتەوە و وابڕیارە لە ماوەی کەمترە لە 10 مانگ تەواو بکرێت.

چیرۆکی سەرەکی: پرۆژەی ئاوی دەربەندیخان لە ساڵی 2014ەوە دەست بە دروستكردنی كرا، بەڵام بەهۆی گرفتی داراییەوە لە ساڵی 2019 كاركردن تیایدا وەستا، 15/7/2025 بڕیار لەسەر دەستپێکردنەوەی کارەکانی پرۆژەکە و تەواو کردنی درا.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای گوت: گوژمەی یەکەمی پارە بە بەڵێندەر دراوە، کارەکانی خاوێن کردنەوە خۆڕێکخستنەوەی دەست پێکردووە، هەندێک ئامێری میکانیکی و کارەبایی گواستراونەتەوە سەر پرۆژەکە، وابڕیارە لە ماوەی نۆ بۆ 10 مانگی داهاتوودا پرۆژەکە تەواو بکرێت.

زانیاریی زیاتر: پڕۆژەکە یەکەی پاککردنەوەی لەخۆدەگرێت و توانای بەرهەمهێنانی هەزار مەترسێجا ئاوی خاوێنی هەیە لە کاتژمێرێکدا، دەتوانرێت لە داهاتوو 500 مەترسێجای دیکە لە تواناکەی بەرز بکرێتەوە.

بۆچی گرنگە: بە تەواوکردنی ئەم پرۆژەیە كێشەی كەمئاوی و خراپی کوالێتی ئاوی خواردنەوە لە دەربەندیخان چارەسەر دەکرێت و 75 هەزار هاونیشتمانی لێی سوودمەند دەبن.