وردبینی لە کەیسی وانەبێژانی پاشکۆ دەکرێت

ئاڤا نیوز


لیستی وانەبێژانی پاشکۆی سەر بە وەزارەتی خوێندنی باڵا، لەلایەن دیوانی ئەنجوومەنی وەزیرانەوە داواکراوە بۆ ئەوەی کاریان لەسەر بکرێت، ئێستا لە ئەنجوومەنی گشتیی ڕاژە وردبینیان بۆ دەکرێت.

وێنە گەورەکە:  مانگی 10ی ساڵی ڕابردوو بڕیاری دامەزراندن بە گرێبەست بۆ وانەبێژانی سەربە خوێندنی باڵا دەرکرا و چوار هەزار و  100 مامۆستا دامەزران، بەشێکی ئەو مامۆستایانەی شایستەن، نەکران بەگرێبەست،  دواتر وەزارەتی خوێندنی باڵا هەموویانی کرد بەیەک لیست و ژمارەیان هەزار و 600 وانەبێژە.

لێدوانی فەرمی:  د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستیی کوردستان بە ئاڤای گوت، "لەلایەن دیوانی ئەنجوومەنی وەزیرانەوە داوای ناوی مامۆستایانی پاشکۆمان لێکرا و ئێمەش ڕەوانەمان کردووە، بۆ ئەوەی کاریان لەسەر بکرێت و ئەگەر شایستەبن بکرێن بە گرێبەست."

لەلایەکی دیکەوە: سەرچاوەیەک لە ئەنجوومەنی ڕاژەی گشتیی هەرێمی کوردستان بە ئاڤای گوت، "وردبینیمان لە لیستی مامۆستایانی پاشکۆ دەستپێکردووە و وردبینی لە داتا و زانیارییەکانیان دەکەین، لە چەند ڕۆژی داهاتوو تەواو دەبن و وەڵامی ئەنجوومەنی وەزیران دەدەینەوە."