ڕاوێژکارێکی سوودانی بۆ ئاڤا: بڕیارەکەی بانکی ناوەندی هەژماری مووچەخۆران لە بانک ناگرێتەوە

ئاڤا نیوز

بەگوێرەی بڕیارێکی بانکی ناوەندی عێراق بڕی ئەو پارەیەی لە هەژمارە بانکییەکاندا وەک "حیجز" پێویستە بمێنێتەوە لە 8%ەوە بۆ 18% بەرزکراوەتەوە، ڕاوێژکاری سەرۆکوەزیرانی عێراقیش بۆ کاروباری ئابووری بە ئاڤای ڕاگەیاند، بڕیارەکە  هەژماری مووچەخۆران لە بانک و هیچ هەژمارێکی دیکە ناگرێتەوە و ئەو ڕێژەیە لە پارەی دانراوەی بانکەکان لای بانکی ناوەندی "حیجز"ی دەخرێتەسەر.

ئەوەی پێویستە بیزانیت: ڕۆژی هەینی بانکی تەیفی ئیسلامی ڕایگەیاند، لەسەر بڕیاری بانکی ناوەندی، پاشەوتکردنی ناچاری لەسەر پارەی دانراوی ئەو هەژمارانەی لە بانکەکەیان کراونەتەوە، بڕەکەی لە 8%ەوە بۆ 18% بەرزکراوەتەوە، ئەوەش لە چوارچێوەی هەوڵەکانی بانکی ناوەندییە بۆ بەهێزکردنی دۆخی دارایی وڵات.

لێدوانی فەرمی: مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری ئابووری بە ئاڤا میدیای ڕاگەیاند، دانانی "حیجز" لەسەر هەژمارە بانکییەکان بابەتێکە پەیوەندی بە بانکەکان و بانکی ناوەندییەوە هەیە ئەویش لە چوارچێوەی گرتنەبەری سیاسەتێکی نەختینەیی تووند، ئەمەش بەشێکە لە پاراستنی پارەی هاووڵاتیان لای بانکەکان بەجۆرێک ئەگەر بانکەکان کێشەی کەمی نەختینەیان هەبێت و نەتوانن پارە بدەنەوە بە خاوەن هەژمارەکان، بانکی ناوەندی سوود لەو پارە  "حیجز"کراوە وەردەگرێت بۆ گەڕانەوەی بۆ خاوەنەکانیان.

وتیشی، ئەم بابەتە پێی دەڵێن "حیجز"کردنی ناچاری پارەی بانکەکان لای بانکی ناوەندی، بەڵام هەژماری بانکی مووچەخۆران پرۆتۆکۆل و بنەمای تایبەتی خۆی هەیە، واتە بڕیارەکە ڕێگری ناکات لە ڕاکێشانی پارە بە ڕێژەی جیاواز لەسەر جۆر و ناوی پارە دانراوەکان.