مەسرور بارزانی: بەردەوام دەبین لە سەرخستنی پەیامی ئاشتی و پێکەوەژیان

ئاڤا نیوز

سەرۆکوەزیران مەسرور بارزانی دووپاتی کردەوە، حکومەتی هەرێمی کوردستان بەردەوام دەبێت لە سەرخستنی پەیامی بەیەکەوەژیان و ڕێزگرتن لە هەموو ئاینەکان نەک تەنیا لە هەرێمی کوردستان بەڵکو لە سەرتاسەری ڕۆژهەڵاتی ناوەڕاست.

چیرۆکی سەرەکی: ئەمڕۆ یەکشەممە سەرۆکوەزیران مەسرور بارزانی، کەنیسەی ئوم ئەلنووری لە عەنکاوە کردەوە، کەنیسەکە لە لایەنی حکومەتی هەرێمی کوردستان دروست کراوە و ڕووبەرەکەی نزیکەی پێنج هەزار مەتر دووجایە، جێگای زیاتر لە هەزار کەس دەبێتەوە و تایبەتەبە ئاوارە سریانییە ئەرسۆدۆکسەکان.

لێدوانی فەرمی: سەرۆکوەزیران مەسرور بارزانی لە ڕێوڕەسمی کردنەوەی کەنیسەی ئوم ئەلنوور، گوتی: زۆر خۆشحاڵم بەشدارم لە کردنەوەی کەنیسەی ئوم ئەلنوور، هیوادارم ئەو کەنیسەیە ببێە شوێنێکی گرنگی خواپەرستی خوشک و برایانی کریستیان لە عەنکاوە و ببێتە مەڵبەندێکی پەرەپیدانی زیاتری برایەتی و دۆستایەتی و نێوان ئاینەکان و گەشەپیدانی زیاتری کولتووری پێکەوەژیان لە هەرێمی کوردستان.

- لەم ساڵانەی دواییدا بە تایبەت دوای هێرشی تیرۆرستانی داعش بۆ سەر هەرێمی کوردستان و مووسڵ و دەشتی نەینەوا ، هەزاران خوشک و برایانی کریستیان لەو ناوچانە ناچاربوون ماڵ و حاڵی خۆیان جێبێڵن و پەنا بۆ هەرێمی کوردستان بێنن، بەتایبەت لە عەنکاوە نیشتەجێ ببن و بە ئاشتی و ئارامی بژین، هەندێکیان بەهۆی نا سەقامگیری ناوچەکانیان تا ئێستا لە هەرێمی کورستان ماونەتەوە.

- حکومەتی هەرێمی کوردستان بەردەوام دەبێت لە هەوڵەکانی خۆی بۆ کۆتایی هێنان بەم بارودۆخە سەپێنراوەی دەشتی نەینەوا و دروستکردنی کەشێکی ئارام و سەقامگیر بۆ ئەوەی خوشک و براکانمان بتوانن بە سەربەرزی و بە ئارەزووی خۆیان بۆ ماڵ و کەنیسەکانیان بگەڕێنەوە.

-حکومەتی هەرێمی کوردستان بەردەوام دەبێت لە سەرخستنی پەیامی بەیەکەوەژیان و ڕێزگرتن لە هەموو ئاینەکان نەک تەنیا لە هەرێمی کوردستان بەڵکو لە سەرتاسەری ڕۆژهەڵاتی ناوەڕاست.