ساسان عەونی: پڕۆژەی ئاوی دووکان - سلێمانی لەسەر بودجەی وەزارەتی شارەوانی و گەشتوگوزار جێبەجێ دەکرێت

ئاڤا نیوز

کابینەی نۆی حکومەتی هەرێمی کوردستان یەکێک لە کارە لە پێشینەکانی چارەسەرکردنی کێشەی کەمئاوی بوو لە سەرجەم شار و شارۆچکەکان، وەزیری شارەوانی و گەشتوگوزاریش دەڵێت: تاوەکو دوو ساڵی دیکە کێشەی کەمئاوی کۆتایی دێت.

وێنە گەورەکە: ئەمڕۆ 12-10-2025، لە دیوانی وەزارەتی شارەوانی و گەشتوگوزار لە مەراسیمێکدا بە ئامادەبوونی قوباد تاڵەبانی، جێگری سەرۆکی ئەنجوومەنی وەزیران و ساسان عەونی، وەزیری شارەوانی و گەشتوگوزار، پڕۆژەی هێڵی سێیەمی دووکان - سلێمانی واژۆکرا.

لێدوانی فەرمی: ساسان عەونی، وەزیری شارەوانی و گەشتوگوزاری حکومەتی هەرێمی کوردستان ڕایگەیاند: پڕۆژەی هێڵی سێیەمی دووکان - سلێمانی بە بڕی 423 ملیۆن و 890 هەزار دۆلار لەسەر بودجەی وەزارەتی شارەوانی و گەشتوگوزار واژۆ کرا و لەلایەن کۆمپانیای هابیکا جێبەجێ دەکرێت.

زانیاریی بەدەستهاتوو: بڕی ئاوی دابینکراو لە هێڵی ئاوی دووکان یەک و دووکان دوو، 192 هەزار و 984 مەتر سێجایە، لەم بڕەش 33 هەزار مەتر سێجا ئاو بە چەمچەماڵ و حەوزی بازیان دەدرێت، واتە تەنیا 160 هەزار مەتر سێجا ئاو بۆ سلێمانی دەمێنێتەوە، بەمەش بری 277 هەزار و 500 مەتر ئاو سێجا کورتهێنان هەیە.

زانیاریی تایبەت: ئێستا سلێمانی لە ڕۆژێکدا پێویستی بە 437 هەزار و 500 مەتر سێجا ئاو هەیە.

زانیاریی زیاتر: پێکهاتەی پڕۆژەی هێڵی دووکان - سلێمانی بەم شێوەیە؛ بەشی وەرگری ئاو لەسەر زێی بچووک، وێستەگەی خاوێنکردنەوەی ئاو بە توانای 480 هەزار مەتر سێجا، دوو وێستگەی پاڵنان و بەرزکردنەوەی ئاو، دوو هێڵی سەرەکی گواستنەوەی ئاو لە دوکان بۆ سلێمانی بە تیرەی هەزار و 400 ملیەتر و بە درێژی 112 کیلۆمەتر، هێڵی کارەبای 33 کەیڤی.

لەلایەکی دیکەوە: ساسان عەونی ئاماژەی بەوە کرد؛ تا دوو ساڵی دیکە کێشەی کەمئاوی لە شار و شارۆچکەکانی هەرێمی کوردستان نامێنێت.

ئەوەی پێویستە بیزانیت: پڕۆژی هێڵی سێیەمی دووکان - سلێمانی هاوشێوەی پڕۆژە گەورەکانی دیکە، لە چوارچێوەی پلان و ستراتیژی و کارنامەی کابینەی نۆیەمی حکومەتی هەرێمی کوردستانە، بۆ چارەسەرکردنی کێشە لە مێژینەکانی شارەکان دانراوە.

بۆچی گرنگە: جێبەجێکردنی ئەم پڕۆژەیە کێشەی کەمئاوی لە سلێمانی و بەشێک لە ناوچەکانی دەورووبەری چارەسەر دەبێت، هاوکات بەرهەمهێنانی ئاوی بە کوالێتییەکی بەرز دەبێت.