کارەکانی پرۆژەی جووتسایدی هەولێر - کۆیە زیاتر لە 12%ی تەواو کراوە

ئاڤا نیوز

کارکردن لە پرۆژەی بە دووسایدکردنی ڕێگەی نێوان هەولێر - کۆیە بە درێژایی 37 كیلۆمەتر بەردەوامە. بەڕێوەبەرایەتیی ڕێگاوبانی هەولێریش ئاشکرای دەکات، پرۆژەکە ئێستا 12.5%ی کارەکانی کراوە و کارکردنیش تێیدا بەردەوامە.

وێنە گەورەکە: ڕێگای نێوان هەولێر - کۆیە، بە شادەماری ڕێگاكانی كوردستان دادەندرێت و پڕۆژەیەكی ستراتیژی و گرنگی ڕێگاوبانی سنووری پارێزگای هەولێرە، لە سەر فەرمانی مەسرور بارزانى، سەرۆكوەزیرانى هەرێمى کوردستان، بە گوژمەی 560 ملیار و 443 ملیۆن دینار بە بەرزترین ئاستی کوالێتی جیهانی دەست بە جێبەجێکردنی کراوە.

لێدوانی فەرمی: ئەندازیار، خەتاب قادر، بەڕێوەبەری ڕێگاوبانی هەولێر بە ئاڤا میدیای ڕاگەیاند، کارکردن لە پرۆژەی جووتسایدی ڕێگای هەولێر - کۆیە بەدرێژایی 37 كیلۆمەتر لەلایەن کۆمپانیای ئوزان بەردەوامە.

ئاماژە بەوەش دەکات، پرۆژەکە لە 6-1-2025 دەست بە کارەکانی کرا و ماوەکەشی هەزار و 275 ڕۆژە، تا ئێستا نزیکە 12.5%ی کارەکانی جێبەجێکراون. دەشڵێت، ئەگەر کەشوهەوا ڕێگر نەبێت، زووتر لەو ماوەیەی کە بۆی دانراوە، تەواو دەکرێت.

زانیاریی زیاتر: بە تەوابوونی جووتسایدی هەولێر - کۆیە، دووری ڕێگاکە بۆ 27 خولەک کەم دەکاتەوە.

ئەوەی پێویستە بیزانیت: ڕێگاکە، سێ لاین ڕۆیشتن و سێ لاین هاتنە، پانی هەر لاینێکی 12 مەترە، بە سێ چینی 22 سانتیمەتری قیڕ دەکرێت، ڕێگاکە شەش ئۆڤەر پاس و پێنج ژێر پرد و پردێکی گەورەی بە درێژی 250 مەتری تێدایە، جگە لە دروستکردنی 160 ئاوبڕی کۆنکرێتی.

ئەمەش بزانە: پڕۆژەکە بەشێكە لە تۆڕی شادەماری ڕێگاوبانی کوردستان، هەولێر بە پارێزگاكانی "سلێمانی، هەڵەبجە، ئیدارە سەربەخۆكان" دەبەستێتەوە، لە هەولێریشەوە بەرەو پارێزگای دهۆك.