پەرلەمانتارێکی کوردی ئاکپارتی داوای ئازادکردنی دەمیرتاش و چوونی شاندێک بۆ لای ئۆجەلان دەکات

ئاڤا نیوز

پەرلەمانتارێکی ئاکپارتیی دەسەڵاتداری تورکیا بە پێویستی دەزانێت بۆ سەرخستنی پرۆسەی ئاشتی سەڵا‌حەدین دەمیرتاش ئازاد بکرێت و شاندێکی ئەو کۆمیسیۆنەی بۆ ئەم پرۆسەیە لە پەرلەمان پێکهێنراوە سەردانی عەبدوڵڵا ئۆجەلان لە دوورگەی ئیمراڵی بکات.

وێنە گەورەکە: هەوڵەکان بە ئاراستەی خێراکردنی پرۆسەی ئاشتی لە تورکیا بەردەوامن، داواکاری سەرەکی ئەوەیە شاندی کۆمیسیۆنی یەکڕیزیی نیشتمانی، برایەتی و دیموکراتی سەردانی ئۆجەلان لە ئیمرالی بکەن.

لێدوانی فەرمی: سالیم ئەنساریئۆغڵو، پەرلەمانتاری ئاک پارتی بە (مێدیاسکۆپ)ـی ڕاگەیاندووە پێویستە لیژنەی یەکڕیزیی نیشتمانی، برایەتی و دیموکراتی لەگەڵ ئۆجەلان کۆببێتەوە و بۆ بەرەوپێشچوونی پرۆسەکەش ئازادکردنی دەمیرتاش بە گرنگ دەزانێت.

بە تەنیشت ئەم بابەتەوە: ئەو پەرلەمانتارە کوردە ئاماژە بەوە دەدات وێڕای ئەو کێشانەی لە ڕۆژهەڵاتی ناوەڕاست سەریان هەڵداوە، پرۆسەی ئاشتی هەنگاوی باشی بڕیوە و دەڵێت: پێموایە لەمەودوا کێشەی شەڕوپێکدانان لە تورکیا نامێنێت.

ئەوەی پێویستە بیزانیت: سالیم ئەنساریئۆغڵو بە پێویستی دەزانێت پرۆسەی ئاشتی ببێتە هۆی ئەوەی تێڕوانینی تورکیا لەبارەی تەواوی کوردانەوە بگۆڕێت و تورکیا ببێتە پارێزەری کوردانی پارچەکانی دیکەی کوردستان.