ئێران: بەشداری لە لووتکەی ئاشتیی شەرەم شێخ ناکەین

ئاڤا نیوز

ئێران ڕایدەگەیێنێت کە سەرۆککۆمار و وەزیری دەرەوەی وڵاتەکە بەشداری لە لووتکەی تایبەت بە غەززە کە لە میسر ناکەن، ئەمەش دوای پشتڕاستکردنەوەی وەرگرتنی بانگهێشتنامە لە میسرەوە.

چیرۆکی سەرەکی: میسر ئەمڕۆ دووشەممە 13-10-2025، لە شەرەم شێخ لووتکەیەکی ئاشتی بۆ غەززە بەڕێوەدەبات کە بە سەرۆکایەتی عەبدولفەتاح سیسی، سەرۆکی میسر و و دۆناڵد ترەمپ، سەرۆکی ئەمریکا و بە بەشداری سەرکردەی زیاتر لە بیست وڵات و ئەنتۆنیۆ گۆتیرێس، سکرتێری گشتی نەتەوەیەکگرتووەکان بەڕێوەدەچێت.

بڵاوکراوەی فەرمی: بەپێی ئاژانسی هەواڵی فەرمی "ئیرنا"، ئێوارەی یەکشەممە ئێران، بانگهێشتنامەیەکی فەرمی لە میسرەوە پێگەیشتووە بۆ بەشداریکردن لە لووتکەکە.

ئەوەی لەبارەیەوە دەگوترێت: بەرەبەیانی ئەمڕۆ دووشەممە، عەباس عێراقچی، وەزیری دەرەوەی ئێران لە پۆستێکدا لە پلاتفۆرمی "ئێکس" نووسیویەتی: "نە سەرۆک پزیشکیان و نە من ناتوانین مامەڵە لەگەڵ هاوتاکانمان بکەین کە هێرشیان کردووەتە سەر گەلی ئێران و بەردەوامن لە هەڕەشەکردن لێمان و سەپاندنی سزاکان بەسەرماندا."

لە هەمان کاتدا: عێراقچی جەختی لەوە کردەوە کە تاران سەرەڕای ئەوەش، پشتگیری لە هەر دەستپێشخەرییەک دەکات "بۆ کۆتاییهێنان بە کۆمەڵکوژییەکەی ئیسرائیل لە غەززە" و بەرگریکردن لە مافی فەڵەستینییەکان بۆ دیاریکردنی چارەنووسی خۆیان.