سوودانی هەڕەشەی کشانەوە لە لووتکەی شەرم شێخ دەکات

ئاڤا نیوز

سەرۆکوەزیرانی عێراق هەریەک لە میسر و ئەمریکای ئاگادار کردووەتەوە کە عێراق لە لووتکەی شەرم شێخ دەکشێتەوە ئەگەر بنیامین نەتانیاهۆ، سەرۆکوەزیرانی بەشداری لووتکەکە بکات.

وێنە گەورەکە: میسر ئەمڕۆ دووشەممە 2025-10-13، لە شەرم شێخ لووتکەیەکی ئاشتی بۆ غەززە بەڕێوەدەبات کە بە سەرۆکایەتی عەبدولفەتاح سیسی، سەرۆکی میسر و و دۆناڵد ترەمپ، سەرۆکی ئەمریکا و بە بەشداری سەرکردەی زیاتر لە بیست وڵات و ئەنتۆنیۆ گۆتیرێس، سکرتێری گشتی نەتەوە یەکگرتووەکان، بەڕێوەدەچێت، سەرۆکوەزیرانی عێراقیش یەکێکە لە بەشداربووانی لووتکەکە.

چی ڕوویدا: بڕیار نەبوو بنیامین نەتانیاهۆ، سەرۆکوەزیرانی ئیسرائیل بەشداری لووتکەکە بکات، بەڵام سەرۆکایەتی میسر ڕایگەیاند، هەریەک لە مەحموود عەباس، سەرۆکی دەسەڵاتی فەلەستین، و بنیامین نەتانیاهۆ، سەرۆکوەزیرانی ئیسرائیل، بەشداری لە لووتکەی شەرم شێخ لە شاری شەرم شێخی میسر دەکەن.

زانیاریی بەدەستهاتوو: سەرچاوەیەکی باڵا کە قسەی بۆ ئاژانسی هەواڵی عێراق کردووە، ڕایگەیاند: "محەممەد شیاع سوودانی، سەرۆکوەزیرانی عێراق هەریەک لە میسر و ئەمریکای ئاگادار کردووەتەوە کە عێراق لە لووتکەکە دەکشێتەوە ئەگەر بێت و نەتانیاهو بەشداری لووتکەکە بکات، ئەمەش هەڵوێستێکی یەکلاکەرەوەی عێراقە."

زانیاریی زیاتر: بەگوتەی سەرچاوەکە "هەڵوێستی بەشداربووان هاوشێوەی هەڵوێستی عێراق بووە، بۆیە هەوڵەکەی ترامپ بۆ هێنانی نەتانیاهۆ بۆ لووتکەی شەرم شێخ سەرکەوتوو نەبووە".

ئەوەی لەوبارەیەوە دەگوترێت: نووسینگەی بنیامین نەتانیاهۆ، سەرۆکوەزیرانی ئیسرائیل، ڕایگەیاند ناوبراو بەشداری لە لووتکەی شەرم شێخ ناکات کە تایبەتە بە ڕێککەوتنی ئاشتی و کۆتاییهێنان بە جەنگ لە کەرتی غەززە.

بە تەنیشت ئەو بابەتەوە: هەر لەبارەی بەشداری سوودانی هاوکات نەتانیاهۆ لە لووتکەکە، موقتەدا سەدر، ڕێبەری ڕەوتی نیشتمانیی شیعە لە پۆستێکدا لە تۆڕی ئێکس نووسیویەتی: "زۆر ناشرینە بۆ حیزبە شیعە حاکمەکان و هاوپەیمانەکانیان کە بانگەشەی پشتگیریکردنی مەزهەب دەکەن، سەرۆکوەزیرانیان بەشداری کۆبوونەوەیەک بکات کە ئەگەری هەیە (نەتەن)یش (بە ئاماژەدان بە بنیامین ناتانیاهۆ، سەرۆک وەزیرانی ئیسرائیل) بەشداری تێدا بکات."