لە سنووری سێ شارەوانی دیکەی هەولێر زەوی دابەش دەکرێت

ئاڤا نیوز

لە سنووری هەر سێ شارەوانی دارەتوو، بنەسڵاوە و کەسنەزان، ئامادەکارییەکان لە قۆناغی کۆتاییە و دەست بە دابەشکردنی زەوی بەسەر فەرمانبەران دەکرێت.

وێنە گەورەکە: بەپێی بڕیاری ئەنجوومەنی وەزیران هەموو ئەو فەرمانبەر، خانەنشین و پێشمەرگانەی مەرج و ڕێنمایی پێدانی زەوی دەیناگرێتەوە پارچەیەک زەوییان پێدەدرێت، هەموو شارەوانییەکان ئامادەکاری بۆ جێبەجێکردنی ئەو بڕیارە دەکەن، لە ژمارەیەک لە شارەوانییەکانیش زەوی بەسەر فەرمانبەران دابەش کراوە.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر بە ئاڤا میدیای گوت: ئامادەکاری دابەشکردنی زەوی لە هەرسێ شارەوانی دارەتوو، بنەسڵاوە و کەسنەزان لە قۆناغی کۆتاییە و تەنیا هەندێک وردبینی ماوە، لە کۆتایی ئەم هەفتەیە یان سەرەتای هەفتەی داهاتوو ئەم بابەتەش یەکلایی دەکرێتەوە.

زانیاریی زیاتر: لە سنووری ئەم سێ شارەوانییە لە نێوان 14 هەزار بۆ 16 هەزار کەس لە وەرگرتنی زەوی سوودمەند دەبێت.

لە لایەکی دیکەوە: لە سنووری شارەوانییەکانی سێبیران و ڕزگاری ئامادەکارییەکان لە قۆناغی کۆتاییدان و لە داهاتوێکی نزیکدا کۆتاییان دێت، لە سنووری شارەوانی تەقتەقیش ئامادەکاری بۆ ئەم پرۆسەیە بەردەوامە. 

ئەمەش بزانە: 42 هەزار فەرمانبەر، پێشمەرگە و خانەنشین لە سنووری بەڕێوەبەرایەتیی شارەوانییەکانی هەولێر لە پرۆسەی وەرگرتنی زەوی سوودمەند دەبن، تاوەکو ئێستا سەرووی 10 هەزار کەس تیروپشکی وەرگرتنی زەوییان بۆ کراوە.