باڵیۆزی بەریتانیا لە عێراق بۆ مەسرور بارزانی: پیرۆزبایی سەرکەوتنی چاکسازییەکانت لێ دەکەم

ئاڤا نیوز

سەرۆکوەزیران مەسرور بارزانی و باڵیۆزی بەریتانیا لە عێراق کۆبوونەوە، گفتوگۆ لەسەر چاکسازییەکانی حکومەت بە گشتیی و پڕۆژەکانی هەژماری من و ڕووناکی بە تایبەتی کران و باڵیۆزی بەریتانیا پیرۆزبایی سەرکەوتنەکانی لەو بوارانەی لە مەسرور بارزانی کرد.

چیرۆکی سەرەکی: ئەمڕۆ سێشەممە 14-10-2025، مەسرور بارزانی، سەرۆکوەزیرانی کوردستان پێشوازی لە عیرفان سدیق، باڵیۆزی بەریتانیا لە عێراق کرد. لە کۆبوونەوەیەکدا ئەندرۆ بیزلی، کونسولی گشتیی بەریتانیا لە هەرێمی کوردستان ئامادەی بوو، جەخت لە پاراستن و ڕێزگرتن لە مافە دەستووری و دابينكردنى شایستە داراییەکانی هەرێمی کوردستان، لە چوارچێوەی پابەندبوون بە دەستوور و ڕێککەوتنەکان کرا.

ڕاگەیێنراوی فەرمی: ماڵپەڕی حکومەتی هەرێمی کوردستان بڵاویکردەوە، هەردوولا هاوڕا بوون لەسەر ئەوەی پێویستە كێشەی مووچە و شایستە داراییەکانی خەڵکی کوردستان بەشێوەیەکی بنەڕەتی چارەسەر بکرێت، نابێت بابەتەکە بە سیاسی بکرێت. هەروەها بە گرنگییەوە باسی ڕێککەوتنی سێ لایەنییەکەی تایبەت بە دەستپێکردنەوەی نەوتی هەرێمی کوردستان کرا کە پێویستە ببێتە دەستپێکێک بۆ دەرچوونی یاسای نەوت و گاز لە خولی داهاتووی پەرلەماندا.

زانیاریی زیاتر: لە بەشێکی دیکەی کۆبوونەوەدا، سەرۆکوەیران تیشکی خستە سەر چاکسازییەکانی حکومەتی هەرێم لە کەرتە جۆراجۆرەکاندا، بە تایبەتی بەئەنجامگەیشتنی هەردوو پڕۆژەی هەژماری من و ڕووناکی. 

لەلایەکی دیکەوە: باڵیۆزی بەریتانیا پیرۆزبایی و دەستخۆشی سەرکەوتنی ئەو چاکسازییانەی لە سەرۆکوەزیرانی کوردستان کرد. هەڵبژاردنی داهاتووی ئەنجوومەنی نوێنەران و دۆخی گشتیی عێراق و ناوچەکە، تەوەرێکی دیکەی گفتوگۆکان بوو.