کریستیانەکانی کوردستان هاوکاری بۆ ڕۆژئاوای کوردستان کۆدەکەنەوە

ئاڤا نیوز

ڕێکخراوەکانی کۆمەڵگەی مەدەنی و کریستیانەکانی قەزای عەنکاوە لە هەولێر، هەڵمەتێکی کۆمەک و هاوکاریکردنی ڕۆژئاوای کوردستان بە ناونیشانی "کەزی عەنکاوە" ڕادەگەیێنن.

چیرۆکی سەرەکی: بەهۆی هێرش و بۆردوومانەکانی سوپای عەرەبی سووریا بۆ سەر ڕۆژئاوای کوردستان، تا ئێستا بە سەدان هەزار هاونیشتمانی کورد ئاوارە بوون، لە دۆخێکی خراپ ژیان بەسەر دەبەن و پێویستیان بە خۆراک و پێداویستی پزیشکییە.

بڵاوکراوەی فەرمی: ڕێکخراوەکانی کۆمەڵگەی مەدەنی لە عەنکاوە ڕایانگەیاند؛ "کەمپەینەکە لە سۆنگەی هەستی نيشتيمانى و برایەتی و خۆشەویستی و گەیاندنی پەیامی کریستیانەکانە، تێیدا کۆمەک و هاوکاری کۆدەکرێتەوە بۆ پاڵپشتیکردن لە خوشک و برایانی ئازیزمان لە ڕۆژئاوای کوردستان، جەخت لەوەش دەکەنەوە، عەنکاوە لە هەموو قۆناغەکانی مێژوودا بە هەڵوێستە مرۆییەکانی خەڵکەکەی و دانیشتووانەکەی ناسراوە".

ئاماژە بەوەش دەکەن؛ کەمپەین و بەخشینەکە هێمای خۆشەویستی و پردی ئومێدە بۆ لێقەوماوان، ئەو پێداویستییانەی کە داوا کراوە بۆ بەخشین، بریتین لە؛ خۆراک،  جلوبەرگ،  پێداویستییە سەرەکییەکانی ناوماڵ،  بەتانی، ڕاخەر و فەرش، پێداویستیی منداڵان،  کۆمەکی دارایی.

ئەوەی پێویستە بیزانیت: کەمپەینەکە بۆ ماوەی یەک هەفتە بەردەوام دەبێت، لە ڕۆژی دووشەممە 26-1-2026 تاوەکو ڕۆژی 2-2-2026 ، ڕۆژانە لە کاتژمێر 3ـی دوانیوەڕۆ تاوەکو کاتژمێر 8ـی شەو پێشوازی لە وەرگرتنی هاوکارییەکان دەکرێت لەو ناوەندانە:

٠ کۆمەڵەی کشتوکاڵیی مار عودا – عەنکاوەی کۆن.
٠ یانەی لاوانی عەنکاوەی کۆمەڵایەتی – بەرامبەر بنکەی تەندروستی شەهید حەبیب مالح.
٠ کۆڕبەندی خانەنشینانی خێزانی – گەڕەکی ئاشتی / شلاما.
٠ کۆمەڵەی ڕۆشنبیری مەندائی – گەڕەکی 108 بەرامبەر بەڕێوەبەرایەتی ئاسایش.
٠ ناوەندی وەرگرتنی کۆمەکی دارایی (نەختینە)، سەرۆک و ئەندامانی دەستەی کارگێڕیی یانەی مامۆستایانی خێزانی – تەلارەکەی بەرامبەر کەنیسەی مار یوسفە.