باڵیۆزی فەرەنسا لە عێراق ستایشی هەوڵەکانی کابینەی نۆیەم دەکات

ئاڤا نیوز

سەرۆکوەزیران مەسرور بارزانی و باڵیۆزی فەرەنسا لە عێراق کۆبوونەوە و چاکسازییەکانی حکومەتی هەرێمی کوردستان، چارەسەکردنی کێشەکانی نێوان هەولێر و بەغدایان تاوتوێ کرد. 

چیرۆکی سەرەکی: ئەمڕۆ سێشەممە 14-10-2025، مەسرور بارزانی، سەرۆکوەزیرانی کوردستان پێشوازی لە پاتریک دۆرێل، باڵیۆزی فەرەنسا لە عێراق کرد. لە دیدارەکەدا یان برێم، کونسوڵی گشتیی فەرەنسا لە هەرێمی کوردستان ئامادەی بوو، دۆخی گشتیی عێراق و ناوچەکە، چارەسەرکردنی کێشەکانی هەرێمی کوردستان و حکومەتی فیدراڵ تاوتوێ کرا.

ڕاگەییێنراوی فەرمی: بەگوێرەی ڕاگەیێنراوی ماڵپەڕی حکومەتی هەرێمی کوردستان، لە کوبوونەوەکە سەرۆکوەزیران مەسرور بارزانی، وتوویەتی، خوازیاری ئەوەین باشترین پەیوەندیمان لەگەڵ حکومەتی فیدراڵ هەبێت لەسەر بنەمای ڕێزگرتن لە مافە دەستوورییەکان، قەوارەی فیدراڵیی هەرێمی کوردستان، دابینکردنی بەشە بودجەی تایبەت بە هەرێمی کوردستان لە بودجەی گشتيی عێراقدا. هاوکات وتوویەتی، "هیوادارین ڕێککەوتنی ئەم دواییەی هەناردەکردنەوەی نەوتی هەرێمی کوردستان، ببێتە ڕێخۆشکەر بۆ چارەسەرکردنی کێشەکانی نێوان هەردوولا".

لەلایەکی دیکەوە: باڵیۆزی فەرەنسا دەستخۆشی پڕۆژە چاکسازییەکانی لە سەرۆکی حکومەت کرد و ستایشی گرنگیدانی حکومەتی هەرێمی کوردستانی بە ئەنجامدانی پڕۆژەی تایبەت بە ژینگەپارێزی کرد. هەروەها باسی لە سەردانی چاوەڕوانکراوی ئیمانوێل ماکرۆن-ی سەرۆککۆماری فەرەنسای بۆ عێراق و هەرێمی کوردستان لە مانگی دوازدەی ئەمساڵدا کرد.

زانیاریی زیاتر: لە بەشێکی دیکەی دیدارەکەدا، بیروڕا لەبارەی هەوڵ و گفتوگۆکانی پێکهێنانی کابینەی نوێی حکومەتی هەرێم و پرۆسەی هەڵبژاردنی ئەنجوومەنی نوێنەرانی عێراق ئاڵوگۆڕ کرا.