نووسینگەی بانکی ڕافیدەین لەناو بەڕێوەبەرایەتی دەستەی حەشدی شەعبی دادەخرێت

ئاڤا نیوز

لەسەر ڕاسپاردەی دامەزراوەیەکی ئەمریکی و بۆ دوورخستنەوەی مەترسییەکانی سەپاندنی سزا لەلایەن واشنتنەوە، بانکی ڕافیدەین کە بانکێکی حکومی عێراقە، بڕیاریدا نووسینگەی خۆی لەناو بەڕێوەبەرایەتی دەستەی حەشدی شەعبی دابخات.

وێنە گەورەکە: مانگی حوزەیرانی ئەمساڵ قەیرانێکی نوێ بەرۆکی دۆسیەی مووچەی ئەندامانی دەستەی حەشدی شەعبی لە عێراق گرتەوە و بووە هۆی دواکەوتنی دابەشکردنی مووچەکانیان، ئەو کات وابڵاوکرایەوە کە ڕاگرتنی مووچەی ئەندامانی حەشد لەلایەن بانکە حکومییەکانەوە لە چوارچێوەی هەوڵە بەردەوامەکانی ئەمریکادایە بۆ سنووردارکردنی گەیشتنی دۆلار بە ئێران و هاوپەیمانەکانی لە ناوچەکە.

زانیاریی بەدەستهاتوو: سەرچاوەیەکی ئەمنیی عێراق بە ئاڤای ڕاگەیاند، بەم دواییانە بانکی ڕافیدەین گرێبەستی لەگەڵ کۆمپانیای کەی دوو ئینتێگرێتی ئەمریکی واژۆ کردووە کە تایبەتمەندە بە ڕاوێژکاری لە بوارەکانی دارایی و چاودێریی، ئامانجی ڕێککەوتنەکەش دابینکردنی پارێزبەندی و دوورخستنەوەی بانکەکەیە لە سزاکانی ئەمریکا بەتایبەتیش کە ڕاپۆرتی نەرێنی لەسەر بانکی ڕافیدەین بڵاوکراونەتەوە،.

ئەوەشی خستەڕوو، لەسەر پێشنیازی کۆمپانیا ئەمریکییەکە، بانکی ڕافیدەین بڕیاریداوە نووسینگەی دەرکردنی کارتی بانکی لەناو بەڕێوەبەرایەتی دەستەی حەشد دابخات، ئەوەش دوای ئەوە هات کە بەشێک لە حکومەتەکانی وڵاتانی عەرەبی سکاڵایان لەسەر بانکی ڕافیدەین لە وەزارەتی خەزێنەی ئەمریکا تۆمارکرد و بە دابینکردنی پشتیوانی دارایی بۆ گرووپە چەکدارەکان تۆمەتباریان کرد.

لەلایەکی دیکەوە: کەریم ئەلشێخ، وتەبێژی دەستەی حەشدی شەعبی بە ئاڤای ڕاگەیاند، لەسەر ئەم بابەتە هیچ زانیارییەکی نییە و وردەکاری ئەم بڕیارەی بەدەستنەگەیشتووە.

باکگراوند: 27ی ئابی ئەمساڵ کۆمپانیای کەی دوو ئینتێگرێتی ئەمریکی ڕایگەیاند لەگەڵ بانکی ڕافیدەین دەستیان بە هاوبەشی ستراتیژی کردووە، ئەویش بە ئامانجی گەشەپێدانی بەرنامەی دەستپاکی بەگوێرەی پێوەرە نێودەوڵەتییەکان، حکومڕانی چاک و بەڕێوەبردنی مەترسییەکان، هاوبەشییەکەش سێ ساڵ بەردەوام دەبێت و بەهۆیەوە بانکی ڕافیدەین بەشێوەیەکی باشتر دەتوانێت خزمەتگوزاری دارایی پێشکەش بە گەلی عێراق بکات.