ئاڤای خەڵک؛ لە هەولێر قوتابییانی بەشە ناوخۆیی شەهید شەوکەت داوای ئاوی گەرم دەکەن

ئاڤا نیوز

لەگەڵ نزیکبوونەوەی وەرزی سەرما و دابەزینی پلەکانی گەرما، قوتابییانی بەشەناوخۆیی شەهید شەوکەت لە هەولێر داواکارییەکی بەپەلەیان ئاراستەی ئاڤا کردووە سەبارەت بە نەبوونی ئاوی گەرم لە بەشە ناوخۆییەکەیان.

زانیاریی بەدەستهاتوو: قوتابیانی بەشەناوخۆیی شەهید شەوکەت دەڵێن بۆیلەرەکانی بەشەناوخۆییەکە کار ناکەن، ئەمەش گرفتێکی گەورەی بۆ خۆشۆردن دروست کردووە، بەتایبەتی لەم کاتەدا کە کەشوهەوا بەرەو ساردی دەچێت. داواکارن بەرلەوەی کەشوهەوا ساردتر ببێت، کێشەکەیان بۆ چارەسەر بکرێت.

لێدوانی فەرمی: سامان عەبدوڵڵا، وتەبێژی سەرۆکایەتیی زانکۆی سەڵاحەددین، بە ئاڤای ڕاگەیاند: "بەهۆی گۆڕینی بۆیلەرەکانەوە ئەو گرفتە دروست بووە، بەڵام دڵنیایی دەدەین کە لە دوو ڕۆژی داهاتوودا گۆڕانکارییەکە تەواو دەبێت و کێشەی نەبوونی ئاوی گەرمیان چارەسەر دەبێت."

زانیاریی زیاتر: وتەبێژی زانکۆی سەڵاحەددین جەختیشی لەسەر ئەوە کردەوە کە جگە لە ئاوی گەرم، خزمەتگوزارییەکانی دیکەش بە شێوەیەکی گونجاو بۆ قوتابییانی بەشەناوخۆیی شەهید شەوکەت دابین دەکرێن.