مەسرور بارزانی: هەگبەی پارتی پڕە لە دەستکەوت

ئاڤا نیوز

مەسرور بارزانی، جێگری سەرۆکی پارتی بەشداری لە کەرنەڤاڵێکی جەماوەریی پارتی کرد و ڕایگەیاند: هەگبەی پارتی پڕە لە دەستکەوت، پڕە لە ئاوەدانی و پێشکەوتن.

چیرۆکی سەرەکی: ڕۆژی پێنجشەممە 16-10-2025، بە ئامادەبوونی مەسرور بارزانی، جێگری سەرۆکی پارتی، کەرنەڤاڵێکی جەماوەریی گەورەی پارتی لە شاری هەولێر بۆ هەڵبژاردنی پەرلەمانی عێراق ساز کرا و هەزاران کەس تێیدا بەشدار بوون.

لێدوانی فەرمی: مەسرور بارزانی، جێگری سەرۆکی پارتی ڕایگەیاند: ئەگەر ئێستا کەسێک هاتبایە و بەڵێنی دابا کە کێشەی کارەبا و قەیرانی ئاو چارەسەر دەکەین، هەوای پیسی هەولێر پاک دەکەینەوە، کارێک دەکەین چیتر هەوای پیس هەڵنەمژن و پشتێنێکی سەوزایی لە دوروبەری هەولێر دروست دەکەین، خزمەتگوزاریی زیاتر پێشکەش بە هاووڵاتیان دەکەین، لەوانەیە پرسێک دروستبووایە ئەو بەڵێنانە زۆرن و جێبەجی ناکرێن، یان دڵمان پێی خۆش بووایە کە ئەمانە بەڵینی گەورەن و بەجێبەجێکردنی پێشکەوتنی گەورە لە وڵاتەکەمان دروست دەبێت، بەڵام ئەمانە بەڵێن نین، ئەو دەستکەوتانەن کە پارتی بۆ ئەم وڵاتە، هەولێر و کوردستان بەجێی هێناوە.

زانیاریی زیاتر: مەسرور بارزانی وتیشی، لە سایەی سەرکردایەتیی حکومەتە یەک لە دوای یەکانەی پارتی سەرپەرشتیی کردووە، هەگبەی پڕە لە دەستکەوت، لە بەرگریکردن لە ماف و کەرامەتی خاک و نیشتمان و ئەو گەلە، لە پێشکەوتن، ئاوەدانی، هەروەها پێشکەوتن و سەرکەوتنی زیاتر چاوەڕێی ئێمە دەکات لە داهاتوودا.