عێراق ژمارەیەک پارچە شوێنەوار لە سویسرا وەردەگرێتەوە

ئاڤا نیوز

لەچوارچێوەی گەڕاندنەوەی شوێنەوارە دزراوەکانی، باڵیۆزخانەی عێراق لە شاری بێرنی پایتەختی سویسرا، ژمارەیەک پارچەی شوێنەواری دێرینی وەرگرتەوە.

چیرۆکی سەرەکی: بەپێی وەزارەتی ڕۆشنبیری و شوێنەواری عێراق، بەهەزاران پارچە شوێنەواری دێرینی عێراق لەمۆزەخانەکانی، بەغدا، نەینەوا و زیقار و چەند پارێزگایەکی دیکە دزراون و بەقاچاخ براونەتە دەرەوەی عێراق بەتایبەتی وڵاتانی ئەوروپا و ئەمریکا، ئەمەش دوای ڕوخانی ڕژێمەکەی سەدام حوسێن لەلایەک و دوای داگیرکردنی چەند پارێزگایەک لەلایەن چەکدارانی داعشەوە هاتووە.

ڕاگەیێنراوی فەرمی: باڵیۆزخانەی عێراق لە بەیاننامەیەکدا ڕایگەیاند: بەهاوکاری لەگەڵ  وەزارەتی ڕۆشنبیری سویسرا، باڵیۆزخانەی عێراق لەسویسرا توانی چەندین پارچە شوێنەواری دێرین  بۆ نیشتمانی دایک بگەڕێنێتەوە. 

زانیاریی زیاتر: باڵیۆزخانەی عێراق جەختی لەوە کردەوە، هەر پارچەیەک لەم شوێنەوارانە چیرۆکێک لەگەڵ خۆیدا دەگێڕێتەوە کە میژووەکەی بۆ هەزاران ساڵ بەر ئێستا دەگەڕێتەوە.

ئەمەش بزانە: لە سێ ساڵی ڕابردوودا، حکومەتی عێراق توانیویەتی زیاتر لە 25 هەزار پارچە شوێنەوار کە بۆ دەرەوەی وڵات بردرابوون، بگەڕێنێتەوە.