ڤەنزوێلا داوا لە ئەنجوومەنی ئاسایش دەکات هێرشەکانی ئەمریکا بە نایاسایی بناسێنێت

ئاڤا نیوز

دوابەدوای پەرەسەندنی گرژییەکانی نێوان ئەمریکا و ڤەنزوێلا، حکومەتی ڤەنزوێلا لە نامەیەکی فەرمیدا داوای لە ئەنجوومەنی ئاسایشی نەتەوەیەکگرتووەکان کردووە کە هێرشەکانی ئەمریکا بۆ سەر کەشتییەکانی نزیک کەناراوەکانی ئەو وڵاتە بە "نایاسایی" بناسێنێت و بەیاننامەیەک بۆ پشتیوانی لە سەروەری نیشتمانیی ڤەنزوێلا دەربکات.

ڕاگەیێنراوی فەرمی: ساموێل مۆنکادا، باڵیۆزی ڤەنزوێلا لە نەتەوەیەکگرتووەکان، ئەمریکای تۆمەتبار کردووە بە هێرشەکانی ئەم دواییەی بۆ سەر "کەشتییە مەدەنییەکان لە ئاوە نێودەوڵەتییەکاندا" کە بە هۆیانەوە لانیکەم 27 کەس کوژراون.

زانیاریی زیاتر: ڤانزوێلا داوای لە ئەنجومەنەکە کرد لێکۆڵینەوەیەکی سەربەخۆ ئەنجام بدات بۆ دیاریکردنی سروشتی نایاسایی ئۆپەراسیۆنەکە و دووپاتکردنەوەی بنەماکانی ڕێزگرتن لە یەکپارچەیی خاک و سەربەخۆیی سیاسیی ڤەنزوێلا.

ئەمەش بزانە: لە چەند هەفتەی ڕابردوودا هێزەکانی ئەمریکا لانیکەم پێنج هێرشیان بۆ سەر ئەو کەشتیانە ئەنجامداوە کە بە گوتەی ئەمریکا سەرقاڵی بازرگانیکردنن بە ماددەی هۆشبەر.