هێڵی ئاسمانیی توركیا هەفتانە چوار گەشت بۆ فڕۆكەخانەی سلێمانی ئەنجام دەدات

ئاڤا نیوز

بەشی پەیوەندیە گشتییەكان و ڕاگەیاندنی فڕۆكەخانەی نێودەوڵەتیی سلێمانی ڕایدەگەیەنێت، لەگەڵ دەستپێكردنەوەی گەشتەكانی هێڵی ئاسمانیی توركیا، هەفتانە ئەو هێڵە چوار گەشتی بۆ فڕۆكەخانەی سلێمانی دەبێت؛ یەكەم گەشتیش لە ئیستانبوڵەوە بەرەو سلێمانی دەبێت.

چیرۆکی سەرەکی: ڕۆژی 15ـی ئەم مانگە، هێڵی ئاسمانیی 'توركیش ئێرلاین' سیستمی فرۆشتنی تكتی گەشتی ئاسمانیی بۆ فڕۆكەخانەی نێودەوڵەتیی سلێمانی كارا كرد، لەهەمان ڕۆژدا؛ فڕۆکەخانەی نێودەوڵەتی سلێمانی لە ڕاگەیێنراوێکدا دووپاتی كردەوە، ده‌سه‌ڵاتی فڕۆکه‌وانیی شارستانیی تورکیا ئاگادارینامەی (NOTAM) لە سایتی جیهانی بڵاوکردنەوەی ئاگادارینامە ئەلیکترۆنییەکانی (NOTAM) لابرد، بەواتای ئەوەی؛ ئاسمانی وڵاتەکەی بەڕووی گەشتەکان بۆ فڕۆکەخانەی نێودەوڵەتیی سلێمانی ئاسایی کردەوە.

ڕاگەیێنراوی فەرمی: بەگوێرەی ڕاگەیێنراوی بەشی پەیوەندییە گشتییەكان و ڕاگەیاندنی فڕۆكەخانەی نێودەوڵەتیی سلێمانی كە ئەمڕۆ هەینی 17ـی ئۆكتۆبەر بڵاویكردووەتەوە، هێڵی ئاسمانیی توركیش ئێرلاین خشتەی گەشتەكانی خۆی بۆ فڕۆكەخانەی سلێمانی ناردووە و تێیدا دەردەكەوێت؛ ڕۆژی 3ـی 11ـی 2025، گەشتە ئاسمانییەكان لەنێوان (ئیستەنبوڵ - سلێمانی - ئیستەنبوڵ) دەبێت و هەفتانە بە چوار گەشت دەستپێدەكەنەوە.

باکگراوند: تورکیا لە ڕۆژی 3ـی نیسانی 2023 بڕیاری ڕاگرتنی گەشتە ئاسمانییەکانی نێوان فڕۆکەخانەی سلێمانی و هەموو فڕۆکەخانەکانی تورکیای دەرکرد، ماوەی زیاتر لە 31 مانگە هیچ گەشتێك لەنێوان سلێمانی و توركیا ئەنجام نەدراوە. دوای سەردانەكەی سەرۆكی هەرێمی كوردستان بۆ توركیا لە ڕۆژی 9ـی ئەم مانگە و كۆبوونەوەی لەگەڵ ڕه‌جه‌ب ته‌يب ئه‌ردۆغان، سه‌رۆككۆمارى توركيا، سەرۆکایەتیی هەرێمی کوردستان ڕایگەیاند، ئەردۆغان لەو كۆبوونەوەیەدا فه‌رمانى دا گه‌شته‌ ئاسمانييه‌كانى هێڵى فڕۆكه‌وانيى توركيا بۆ سلێمانى ده‌ست پێبكه‌نه‌وه‌.