ڕێگە لە بەقاچاخبردنی 48 هەزار حەبی كەپتاگۆن بەرەو سعوودیە دەگیرێت

ئاڤا نیوز

دەستەی زەکات و باج و گومرگی سعوودیە، هەوڵێکی بەقاچاخبردنی 48 هەزار حەبی هۆشبەری کەپتاگۆن ئاشكرا دەكات كە هەوڵدراوە لەڕێگەی دەروازەی سنووری حەدیسە لەنێوان سعوودیە و ئوردنەوە، ببردرێتە نێو خاكی سعوودیە.

وێنە گەورەکە: هەوڵی بەقاچاخبردنی ماددەی هۆشبەر بەرەو سعوودیە لەڕێگەی دەروازە سنوورییە وشكانییەكانەوە بووەتە دیاردە؛ بەتایبەت لە دەروازەی سنووری حەدیسە لەنێوان سعوودیە و ئوردن، پێشتریش چەندین هەوڵی تێپەڕاندنی ماددەی هۆشبەر لەو دەروازەیە ڕوویدا، دوایین حاڵەتیش؛ لەمانگی ئابی ڕابردوو بوو، كاتێك هەوڵدرا بڕی 406 هەزار دەنكە حەبی كەپتاگۆن ببردرێتە نێو خاكی سعوودیە.

لێدوانی فەرمی: مەحمود حەربی، وتەبێژی دەستەی زەکات و باجی گومرگی سعوودیە ڕایگەیاند، حەبە هۆشبەرەكان لەنێو بارهەڵگرێك شاردرابوونەوە؛ دوای گەیشتنی بارهەڵگرەكە بە دیوی سعوودیەی دەروازەی سنووری حەدیسە، لەڕێگەی ئامێری پشکنینەوە نزیكەی 48 هەزار حەبی هۆشبەری جۆری كەپتاگۆن دۆزراوەتەوە.

زانیاریی زیاتر: وتەبێژی دەستەی زەكات و گومرگی سعوودیە ئاماژەی بەوەشكردووە، بەهەماهەنگی لەگەڵ بەڕێوەبەرایەتیی گشتیی بەرەنگاربوونەوەی ماددە هۆشبەرەكان، توانیویانە دەست بەسەر ئەو بڕە زۆرەی ماددەی هۆشبەردا بگرن و چوار گومانلێكراویش دەستگیر بكەن.