ترەمپ: کاتی وەستانی شەڕی ڕووسیا و ئۆکراینا هاتووە

ئاڤا نیوز

دۆناڵد ترەمپ، سەرۆکی ئەمریکا لە میانی کۆبوونەوەیەکدا لەگەڵ ڤۆلۆدیمیر زێلێنسکی هاوتا ئۆکراینییەکەی ڕاگەیاند، 'کاتی ئەوە هاتووە ڕێککەوتنێک لەگەڵ ڕووسیا ئەنجامبدرێت بۆ کۆتاییهێنان بە شەڕی ئۆکراینا'

چیڕۆکی سەرەکی: ڕۆژی پێنجشەممە پێش کۆبوونەوەی دۆناڵد ترەمپ، سەرۆکی ئەمریکا و ڤۆلۆدێمیر زێلێنسکی سەرۆکی ئۆکراینا، ترەمپ پەیوەندییەکی تەلەفۆنی لەگەڵ ڤلادیمێر پووتین، سەرۆکی ڕووسیا ئەنجامدا و ترەمپیش گفتوگۆکانیانی بە ئەرێنی و بەرهەمدار وەسف کرد، ڕۆژی هەینی ترەمپ لە کۆشکی سپی پێشوازی لە زێلێنسکی کرد.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، 'بۆ ئەوەی جەنگی ڕووسیا و ئۆکراینا کۆتایی بێت، پێویستە چەکی تۆماهۆک و چەکەکانی دیکە بدەنە ئۆکراینا، بەڵام هیوادارە بەبێ ناردنی تۆماهۆک بتوانن ئەو جەنگە کۆتایی پێبهێنن، چونکە ئەو مووشەکە کاولکاری و پێشهاتەی خراپ دروست دەکەن، پێویستە هەردوولا خوێنڕشتنەکە ڕابگرن، دووپاتیشی دەکاتەوە کە ئەگەر خۆی سەرۆک بوایە  شەڕی ئۆکراینا هەرگیز دەستی پێنەدەکرد'.

بۆچوونی لایەنی بەرامبەر: هەرچەندە زێلێنسکی لەگەڵ ترەمپ نەگەیشتە ڕێککەوتن لەسەر دابینکردنی مووشەکی تۆماهۆک بۆ کێێف بەڵام ناوبراو سەردانەکە بە ئەرێنی وەسف دەکات لە چاوپێکەوتنێکدا لەگەڵ کەناڵی ئێن بی سی نیوز ڕایگەیاند، ترەمپ لەسەر پرسی مووشەکی تۆماهۆک ''نەیگوت بەڵی بەڵام ، نەیگوت نەخێر''.