لە كرماشان سزای 20 ساڵ بەندكردن بەسەر هەشت چالاكوانی كورد دەسەپێنرێت

ئاڤا نیوز

هەشت چالاكوانی كوردی دانیشتووی كرماشان لە ڕۆژهەڵاتی كوردستان، بە 20 ساڵ زیندانیكردن سزا دەدرێن.

وێنە گەورەكە: دەستگیركردنی چالاکوانانی مەدەنی بەشێوەیەكی گشتی و خانمە چالاکوانەکان بەتایبەت لە ئێران بووەتە دیاردە، ژمارە و داتاكان دەڵێن تا دێت دیاردەكە ڕوو لە هەڵكشانە و بەشێكی زۆر لەو چالاكوانانەی دەستگیر دەكرێن، هیچ پاساو و بەهانەیەکی یاسایی نییە بۆ بەندكردنیان.

بڵاوكراوەی فەرمی: بەپێی ڕاپۆرتێكی ڕێكخراوی مافی مرۆڤیی هەنگاو، چالاكوانە كوردە سزادراوەكان، چالاكییەكانیان زیاتر لە بواری مەزهەبی ئایینی بووە و هەر بەو تۆمەتەش لەلایەن دەسەڵاتدارانی ئێرانەوە دەستگیركراون و حوكم دراون.

زانیاریی زیاتر: پێنج لە چالاكوانەكان كە خەڵكی جوانڕۆن و، سیانی دیكەیان كە خەڵكی سەرپێڵی زەهاون، لەلایەن دادگای ئینقلابی كرماشانەوە بەتۆمەتی ئەندامیەتی لە گرووپەكانی دژ بە دەسەڵات دەستگیركراون و سزادراون و دۆسیەكانیان ئەگەرچی تانەی لێدراوە بەڵام لەلایەن دادگای پێداچوونەوەی كرماشان دووبارە پەسەندكراونەتەوە.

ئەوەش بزانە: ئەو هەشت چالاكوانە كوردە بەر لەوەی حوكم بدرێن، ماوەی دوو مانگ لە گرتووخانەی مەیدانی نەوتی كرماشان دەستبەسەركرابوون و پاشان بە دانانی بارمتە بە بڕی یەك ملیار تمەن ئازادكرابوون، بەر لەوەی جارێكی دیكە دەستگیر بكرێنەوە و سزایان بەسەردا بسەپێنرێت.