بەرەی گەل: ڕەشبگیری بەرامبەر ئەندام و لایەنگرانمان هەیە

ئاڤا نیوز

ئەندام و لایەنگرانی بەرەی گەل لەبەردەم بارەگای UN لە شاری هەولێر گردبوونەوە و ڕاگەیێنراوێکی ناڕەزایەتییان خوێندەوە و داوای ئازادکردنی لاهوور شێخ جەنگی سەرۆکی حیزبەکەیان دەکەن. 

وێنە گەورەکە: 22ی ئاب هێزە ئەمنییەکانی سلێمانی بەهۆکاری ئەوەی فەرمانی دەستگیرکردنی هەیە، دەوری ماڵی لاهوور شێخ جەنگی و بارەگای سەرەکی حیزبەکەیان لە هۆتێل لالەزار دا و ڕووبەڕووبوونەوەی سەخت لەنێوان هێزە ئەمنییەکان و هێزی دووپشکی سەر بە لاهوور شێخ جەنگی ڕوویدا، ڕووداوەکە لە ئاستی کوردستان، عێراق و جیهان کاردانەوەی لێکەوتەوە و وەک هەوڵێک بۆ بەکارهێنانی هێزی فەرمی لە "ململانێی سیاسیدا" خوێندنەوەی بۆکرا.

لێدوانی فەرمی: شادومان مەلا حەسەن، سەرکردە لە بەرەی گەل لە کۆنگرەیەکی ڕۆژنامەوانیدا لە بەردەم بارەگای UN لە هەولێر ڕایگەیاند: لەماوەی ڕابردوو هێزێکی 20 هەزار چەکداری یەکێتی بە چەندین چەکی پێشکەوتوو پێکهاتوو لە تۆپ و تانک و باجەری سەربازی و درۆنی خۆکوژی پەلاماری ماڵی لاهوور شێخ جەنگییاندا، ئەمەش بەبێ گوێدانە ئارامی و ئاسایشی شاری سلێمانی، لەماوەی چوار کاتژمێردا ئاگربارانی لالەزاریان کرد، بەهۆیەوە چەندین هاووڵاتی کوژران و بەشێکی دیکەشیان برینداربوون، لەگەڵ دەستگیرکردنی لاهوور شێخ جەنگی و ژمارەیەک لە هاوڕێیانی.  

- "ئەم دەستدرێژیكردنە" بە تۆمەتی بێ بەڵگە و بێ بنەما ئەنجام درا، دوور لە ئەرکی دادگا و پۆلیس و ئاسایش لە کاتێکدا لاهوور شێخ جەنگی، ئەندامی ئەنجوومەنی ئاسایشی هەرێمی کوردستان و ئەندامی هەڵبژێردراوی تازەی پەرلەمانی کوردستان و سەرۆکی بەرەی گەلە.

- ماوەی دوو مانگ بەسەر ڕووداوەکانی لالەزار تێپەڕ دەبێت، تاوەکو ئێستا دادگا ڕۆڵی نەبووە لە چارەسەرکردن و یەکلایکردنەوەی کێشەکان. 

- داوا لە حکومەت دەکەین لێکۆڵینەوە لەگەڵ فەرماندەکانی ئەو هێزانە بکات کە هێرشەکەیان ئەنجام دا. 

- داواكارین هەڵمەتی دەستگیركردنی ئەندام و لایەنگرانی بەرەی گەل ڕابگیرێت.