بەرپرسێكی پارتی: پارتی ڕژدە لەسەر ئەوەی پێش هەڵبژاردن دوو مووچە دابەش بكرێت

ئاڤا نیوز

بەرپرسێكی باڵای پارتی دیموكراتی كوردستان ڕایدەگەیێنێت، پارتی ڕژدە لەسەر ئەوەی؛ پێش هەڵبژاردن دوو مووچە لە بەغداوە ڕەوانە بكرێت و بە مووچەخۆرانی كوردستان بدرێت.

وێنە گەورەكە: لە عێراق دابەشكردنی مووچەی مانگی 10 دەستیپێكردووە، كەچی حكومەتی فیدڕاڵ هێشتا مووچەی مانگی هەشتی مووچەخۆرانی هەرێمی كوردستانی نەناردووە و بڕیارە لەناوەڕاستی هەفتەی داهاتوو ڕەوانەی بكات.

لێدوانی فەرمی: سەربەست لەزگین، بەرپرسی مەكتەبی ڕێكخستنی پارتی دیموكراتی كوردستان لە پارێزگای دهۆك تایبەت بە ئاڤای ڕاگەیاند، پارتی پێداگرە لەسەر ئەوەی پێش هەڵبژاردن بەغدا دوو مووچەی مانگەكانی هەشت و نۆ ڕەوانە بكات و بەسەر مووچەخۆرانی هەرێمی كوردستان دابەش بكرێت.

پەیوەست بەم بابەتەوە: لە بەغدا ڕێکارەکانی خەرجکردنی مووچەی مانگی هەشتی مووچەخۆرانی هەرێمی كوردستان دەستیان پێکردووە و نووسراو ئاڕاستەی وەزیری دارایی كراوە، دواتریش وەزارەتی دارایی عێراق، نووسراوی ناردنی پارە بۆ بانكی ناوەندی دەكات و بە لەبەرچاوگرتنی ڕێكارەكان، ناردنی پارە دەكەوێتە هەفتەی داهاتوو، حکومەتی هەرێمی کوردستان هەوڵەكانی دەستپێكردووە و ئەرک و پابەندییەکانی سەرشانی ئەنجام دەدات بۆ ناردنی مووچەی مانگی نۆ؛ لەو چوارچێوەیەشدا، لیستی مووچەی مانگی نۆ نێردراوە و کێشەی نییە، ئێستاش کار لەسەر گرتنەبەری سێ هەنگاوی تر دەکات كە ئەمانەن:


یەکەم: 120 ملیار دیناری داهاتی نانەوتی مانگی نۆ تاوەکو سەرەتای مانگی یازدە بنێرێت.

دووەم: میزان مراجەعەی مانگی نۆ، کە ڕاپۆرتی خەرجی و داهاتەکانی حکومەت لەخۆدەگرێت، ئەویش بەهەمانشێوە تا سەرەتای مانگی 11 بنێرێت.

سێیەم: شاندی دانوستانکاری حکومەتی کوردستان و وەزیرانی کورد لە بە‌غدا، لەڕۆژانی داهاتوودا هەوڵەکانیان چڕدەکەنەوە و فشار دروست دەکەن بۆ ئەوەی سوودانی ناچار بکەن پێش هەڵبژاردن مووچەیەکی دیکە بنێرێت.